Градинари и овоштари од Струмица и Радовиш ќе добијат швајцарски грантови од 5000 евра, повикот е отворен до 30 април

2154

Швајцарската агенција за развој и соработка ќе додели 250 илјади евра на 50 тина земјоделци од струмичкиот и радовишкиот регион за воведување модерни еколошки мерки во производството на овошје и зеленчук. Средства од третиот циклус на грантови се од проектот за управување со сливот на реката Струмица, кој го спроведува Програмата за развој на Обединетите нации. Преку истиот 20 тина овоштари и 30 градинари од сите 6 општини од струмичко радовишкиот регион може да добијат грантови во висина од 5 илјади евра.

„Овде во сливот на реката Струмица, ги поставивме основите за една долгорочна трансформација на начинот на кој се користат водните ресурси, а модерните мерки во земјоделското производство кои се користат во Европската унија и во Швајцарија ги претвораме во реалност“, рече амбасадорката на Швајцарија Сибил Сутер Техада.

( Проектот е за воведување агроеколошки мерки на басенот околу река Струмица )

За таа цел во рамките на проектот кој се реализира во соработка со Центарот за развој на Југоисточниот плански регион објавен е повик за избор на земјоделски производители кои би се вклучиле во специјализирани обуки за агроеколошкo производство. Можност да се јават на повикот имаат производителите на овошни култури (сливи, јаболка и круши) и градинарски култури (пиперки и домати) од општините Радовиш, Конче, Струмица, Василево, Босилово и Ново Село.

За учество на обуките планирано е да се изберат 40 производители на сливи, јаболка или круши (за обуките во Радовиш) и 60 производители на пиперки и домати (на отворено и затворено) за обуките во Струмица. Понатаму преку тест за проверка на знаењето стекнато во рамките на програмата за обука ќе се одберат 50 грантисти, 20 земјоделски производители на овошни културии 30 производители на градинарски култури од сите 6 општини.

( Од претходните обуки на земјоделците и овоштарите)

Вредноста на секој грант ќе биде до 300.000 денари, средства наменети за набавки на опрема и материјали потребни за примена на предвидените агроеколошки мерки. Обуките ќе се организираат во периодот мај/јуни 2019 – октомври/ноември 2019 година, додека тестирањето ќе биде организирано во текот на месец декември 2019 година или јануари 2020 година.

Крајниот рок за пријавување е 30 април 2019 година. Повеќе информации  можат да се добијат во Центарот за развој на Југоисточниот плански регион а целиот оглас како и документите за пријавување се достапни во електронска форма на следниот линк: http://www.rdc.mk/…/886-o-g-l-a-s-za-uchestvo-na-obuka-i-ra…

( Грантисти од претходните циклуси кои добија опрема од по 5 илјади евра )

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.