Грција од среда отвора седум гранични премини на копнените граници со Македонија, Албанија, Бугарија, Турција, соопшти портпаролот на грчката Влада Стелиос Пецас на денешниот редовен брифинг со новинарите, јави дописничката на МИА од Атина.
Во однос на нашата земја, ќе биде отворен само граничниот премин Евзони (Богородица), додека пак кон останатите три земји отворени ќе бидат по два гранични премина.
Засега нема информација дали преминот ќе биде отворен за македонски државјани. Утре Европската унија треба да ја определи конечната листа на земји за кои ќе ги отвори границите и таа листа ќе биде ревидирана на секои две недели. За да влезе една земја на листата, епидемиолошката состојба со коронавирусот треба да биде соодветна или подобра од просекот на Европската унија.
Според протоколите за пристигнувања во Грција, задолжителни за сите патниците ќе треба да имаат пополнето образец достапен на специјалната интернет страница https://travel.gov.gr/#/. Откако во неколку чекори ќе ги пополнат сите потребни податоци, ќе добијат единствен баркод (QR code), според кој ќе се врши и селекција на патниците и кои ќе бидат тестирани за Ковид-19. Образецот во електронска или отпечатена верзија ќе треба посетителите да го покажат при пристигнувањето на граничниот премин, на аеродромот или на пристаништето.
Во зависност од кодот патниците или ќе бидат однесени во делот за тестирање или ќе им биде дозволено да го продолжат патувањето кон нивната крајна дестинација, но ќе добијат информации и упатства од граничните службеници што би требало да направат во случај да им се појават симптоми.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
