Почнаа работите за реконструкција на патот што води кон браната Турија од каде со вода за пиење се снабдуваат општините Василево и Струмица а преставува и потенцијал за развој на туризмот. Станува збор за проект кој го реализира Општина Василево во соработка и партнерство со Центарот за развој на Југоисточниот плански регион. Според проектната документација треба да се реконструира делница од 800 метри почнувајќи од крстосницата пред населеното место Добрашинци при што истата ќе биде проширена на 5,5 метри.
На денешниот старт на активностите на терен присуствуваше и градоначалникот на Василево Марјан Јанев кој информираше дека овој проект бил избран како приоритетен од страна на Советот за развој на Југоисточниот плански регион минатата година а за истиот Центарот за развој на Југоисточниот плански регион поднесе Барање за користење на средства до Агенцијата за финансиска поддршка во земјоделството и руралниот развој од мерката, Зачувување и унапредување на традиционалните вредности во руралните средини.
„Реализацијата на овој проект е собено важна бидејќи овој пат води кон браната Турија од која со вода за пиење се снабдува дел од населението на општина Василево и градот Струмица а истовремено Брана Турија е и еден од најзначајните туристички локалитети на територија на нашата општина“, изјави градоначалникот на општина Василево Марјан Јанев.
Вкупниот буџет на проектот е околу 190 000 евра или 11 664 618 денари од кои 9 885 270 денари се обезбедени од страна на Центарот за развој на ЈИПР преку АФПРЗ и 1 779 348 денари од Буџетот на општина Василево. Согласно планираната динамика и Договорот со изведувачот, активностите на терен треба да завршат во првите месеци од наредната година.Работите на терен ги изведува градежната компанија Пешо Инженеринг.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
