дома Вести Јавното обвинителство отвори истрага против седум лица од Струмица за обид за...

Јавното обвинителство отвори истрага против седум лица од Струмица за обид за убиство

1012

Основното јавно обвинителство Велес донесе наредба за спроведување истражна постапка против седум лица од Струмица на возраст од 19 години до 25 години за обид за убиство во Стар Дојран.  Истрага е отворена против едно лице на возраст од 24 години за кривично дело убиство во обид од Кривичниот законик, против едно лице за истото кривично дело како поттикнувач и против пет други лица во својство на помагачи при извршување на кривичното дело, информира Јавното обвинителство.

Како што наведува во своето соопштенија Јавното обвинителстов на 1-ви мај пред хотел во Стар Дојран дошло до вербална расправија помеѓу двајца од осомничените кои биле во алкохолизирана состојба и двајца вработени во хотелот. Расправијата преминала во физичка пресметка. На вработените во хотелот им се придружило уште едно лице, додека двајцата сега осомничени повикале уште пет други лица да дојдат во хотелот, бидејќи имаат проблем. Во еден момент сите осомничени го заобиколиле оштетениот кој им помагал на вработените во хотелот. Додека оштетениот му бил завртен со грб, еден од осомничените со нож му нанел две убодни рани во пределот на горната десна страна од грбот и една убодна рана во средината на градниот кош.

Од извршената анализа на алкохол во крвта, како што стои во соопштението, е констатирано дека осомничениот во тој момент бил во алкохолизирана состојба во која самиот се довел со количина од 1,69 промили алкохол во крвта.

Основното јавно обвинителство Велес оценило дека постои можност осомничениот кој директно го извршил делото да се даде во бегство или да го повтори кривичното дело, до судијата на претходна постапка при Основниот суд во Велес поднесло Предлог за определување мерка притвор за ова осомничено лице, додека за останатите осомничени е предложено да бидат определени мерки на претпазливост.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.