Родители на четвртоодделенци од гевгелиското Владо Кантарџиев бараат печатени учебници или ќе продолжат со бојкот на наставата

7397

Заради немање печатени учебници или таблети, револтирани родители на четвртоодделенци при ООУ ,,Владо Кантарџиев’’ од Гевгелија најавија продолжување на бојкотот на наставата и во понеделник. Како што стои во известувањето до јавноста, тие два дена не ги пуштале своите деца на училиште и бараат добивање на учебници за нормално изведување на наставата.

,,Децата немаат ниту печатени учебници, ниту таблети за изведување на наставната програма. Според член 44 од Уставот на Р. Македонија основното образование е задолжително и бесплатно. Според член 2 од законот за учебници за основно и средно образование, учебникот е основно наставно средство,според член 6 од истиот закон учебниците се бесплатни за сите ученици, а според член 24 секој ученик на почетокот на учебната година добива комплет на бесплатни учебници,, стои во реакцијата на родителите кои сметат дека образовниот процес не е еднакво достапен за сите и е дискриминирачки.

Тврдат дека сите родители немаат финансиска можност да обезбедат таблети, лаптопи и интернет услуги за своите деца за да го продолжат своето образование. Бараат од Министерството за образование да им обезбеди комплет печатени учебници како основно наставно средство и нема да потклекнат на заканите и притисоците за намалено поведение на децата ако не одат на настава.

Од раководството на ООУ ,,Владо Кантарџиев’’ и покрај обидите не успеавме да добиеме став или одговор по барањата на родителите на четвртоодделенците кои тврдат дека изминативе два дена не ги пуштиле децата на настава.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.