Разрешена Жулиета Ѓуркова од функцијата директор на ЦРЈПР, засега нема одговор кои се причините

2424

Советот на градоначалници на Југоисточниот плански регион со осум гласа ,,ЗА“ ја разрешија Жулиета Ѓуркова од функцијата директор на Центарот за развој на Југоисточниот плански регион. Одлуката била донесена на седницата одржана во Ново Село а за истата гласале градоначалниците на Струмица, Гевгелија, Босилово, Ново Село, Василево и Конче и  ополномоштените преставници на градоначалниците на Радовиш и Богданци. Не гласале градоначалнците на Валандово и Дојран бидејки не присуствувале на седницата ниту пак пуштиле свои преставници за разрешување на Ѓуркова.

Претседателот на Советот, гевгелискиот градоначалник Андон Сарамандов ни изјави дека со официјална информација за разрешувањето на првиот човек на Центарот за развој на Југоисточниот плански регион ќе даде во текот на утрешниот ден.

Конкретен одговор кои се причините за разрешувањето на Ѓуркова нема ниту од градоначалниците кои ги контактиравме. Соопштија дека така се договориле без да прецизираат зошто се одлучиле за смена на Ѓуркова која има сеуште мандат со оглед на нејзиниот избор пред година и половина. Објаснување зошто е разрешена не добивме ниту од досегашниот директор Ѓуркова.

Според нашите сознанија, разрешувањето на Ѓуркова било без соодветно образложение. Градоначалниците немале забелешка на нејзиното работење и залагање во Центарот но морале да ја донесат одлуката.

Ѓуркова е прв човек на Центарот од самото формирање и во 14 години опстојување се наметна како институција која реализираше низа проекти во интерес на Југоисточниот плански регион. Реализирани се над 85 проекти од кои 15 се финансирани од ЕУ од програмите за прекугранична соработка. Центарот на чело со Жулиета Ѓуркова кои се добитници на повеќе домашни и меѓународни признанија и награди во Југоистокот има инвестирано над 15 милиони евра средства обезбедени од домашни и странски фондови.

Ѓуркова останува во Центарот за развој на Југоисточниот плански регион на раководно место. Перидот што следи ќе биде распишан нов оглас за директор, иако веќе на големо се зборува дека Центарот ќе го води поранешен пратеник од редовите на ВМРО ДПМНЕ кој потекнува од Југоисточниот регион. До тогаш со ова институција ќе раководи Јован Коцев вработен во Центарот како ВД директор.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.