По неколкучасовен застој, попладнево почна исплатата на парични износи до 20 илјади денари на шалтерите на Алта Банка во Струмица. Таму во текот на целиот ден граѓаните нестрпливо чекаа за да ја добијат пензијата, социјалната помош или нега но и плата.
,, Од сабајле чекаме. Нема ред сите се бутат за да влезат и подигнат пари. Кажаа дека има пари а како што гледаме три шалтери работат“, кажаа граѓаните кои се клиенти на Алта Банка и чекаа исплата на шалтер
Пред експозитурата на Алта Банка во Струмица гужви имаше уште од 7 часот. Граѓаните нестрпливо чекаа по што им било кажано дека експозитурата нема готовина и се чека од Народна банка.
,, Се чекале пари да донесат од Скопје со комбе. Нема кој да ти објасни а кажаа дека од денеска пари може да се подигнат и во Струмица“, објасни една госпоѓа која ја чекаше својата пензија
Гувернерот на НБРМ Трајко Славевски завчера најави дека од денеска со работа ќе започнат и шалтери на Алта банката во Струмица и Тетово каде што граѓаните кои имаат сметки, но немаат платежни картички, ќе можат да подигнат до 20.000 денари.
Покрај отворањето на шалтерот, се зголемува и неделниот лимит за користење на платежните картички. Наместо досегашните 10.000 денари, клиентите ќе можат да подигнуваат готовина од банкомати и да плаќаат во продавници до 15.000 денари неделно
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
