Потпишан Меморандум за соработка меѓу „Медија Флеш“ и Локалниот младински совет на Општина Струмица

232

Претседателот на Здружението за медиумска писменост „Медија Флеш“, Ристо Тасев и претседателот на Локалниот младински совет на Општина Струмица потпишаа Меморандум за соработка.

Меморандумот се однесува на резлизирање на проектот „Читај меѓу редови: Спротивстави се на дезинформации и  биди медиумски писмен во ера на дигитални вести!“, којшто го реализира „Медија Флеш“, а во кој активно ќе бидат вклучени и членови на Локалниот младински совет.

Основна цел на проектот е да се унапреди медиумската писменост и да се создадат вештини за критичко размислување и анализирање кај младите во Општина Струмица за да се справат со дезинформациите и лажните вести.

За таа цел, меѓу другото, во рамките на реализирањето на проектот со Меморандумот е договорено да се формира Клуб за медиумска писменост, каде учество ќе имаат форми на младинско организирање и млади и ќе се поттикнува култура на медиумска писменост и критичко размислување.

Овој проект ги поттикнува младите да станат одговорни конзументи на информациите, свесни да носат информирани одлуки и да се вклучуваат во конструктивен дијалог со сите релевантни чинители. Заради сето ова проектот цели и придонесува за создавање информирана и кохезивна заедница.

-Со оглед на предизвиците на дигиталната ера, како што е брзата циркулација на информации што често доведува до ширење на дезинформации и лажни вести, од клучно значење е да се реши ова прашање во општина Струмица, особено кај младите луѓе. Токму тие, како ранлива категорија во општеството се силно погодени од конзумирањето на такви содржини, првенствено преку онлајн порталите и платформите за социјални медиуми како Facebook, Instagram, Youtube, TikTok. Оваа изложеност на парцијални информации и недостатокот на критичко размислување, аналитички вештини и комуникациски способности им отежнуваат да разликуваат што е вистинита, а што е лажна вест, велат од здружението „Медија Флеш“.

Со овој проект ќе се поттикне развој на механизмите за соработка кои се бараат од различни засегнати страни, вклучувајќи медиумски организации, граѓанско општество, образовни институции, локални власти, млади и други чинители. Со заедничка работа, тие можат да го намалат негативното влијание на лажните вести и дезинформациите и преку колективен напор од сите ќе се создаде заедница која е добро подготвена да се движи низ светот на информациите и да оди напред заедно.

Оваа активност е поддржана од проектот „Млади агенти на промената“ имплементиран од „Центар за интеркултурен дијалог“ (ЦИД), „Сојуз на извидници на Македонија“ и Центар за истражување и анализи „НОВУС“ Струмица со финансиска поддршка од ЕУ.

За повеќе информации следете ја фејсбук страницата на Здружението: https://www.facebook.com/mediaflashsr.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.