Општина Босилово подели 1 200 овошни садници на граѓани кои донесоа по 30 пластични шишиња (ФОТО)

1641
„Место да печатевме календари, нотеси, пенкала и друг промотивен матријал за Нова година се одлучивме да ги насочиме за садници за граѓаните“, вели градоначалникот на Босилово Ристо Манчев

Општина Босилово ја реализираше акцијата ,,Овошно дрвце за пластични шишиња“ Во сите населени места од ова општина беа поделени 1 200 дрвца сливи, круши, праски и цреши на домакинства кои донесоа минимум 30 пластични шишиња. Ова е втора по ред акција во Општината која парите за новогодишен репрезентативен  матријал ги насочува за овошни садници. Акцијата има за цел да ги потикне граѓаните за селекција на отпад но и да се засадат и овошки во дворните места .

,, Ова е втора по ред година како ја организираме ова акција бидејки постои интерес кај граѓаните. Собравме околу 16 тракторски  приколки со пластичен отпад кој се рециклира и може да добие нова употребна вредност а за возврат поделивме повеќе видови овошни садници. Парите за ова акција се од ставката за новогодишен репрезентативен матријал во висина од 150 илјади денари. Место да печатевме календари, нотеси, пенкала и друг промотивен матријал се одлучивме да ги насочиме за садници за граѓаните“, ни изјави градоначалникот на Босилово Ристо Манчев

За неполн час беа распределени овошните садници. Граѓаните со вреќи пластични шишиња доаѓаа на предвидените пунктови со намера да добијат овошно дрвце.

,, Ова е одлична акција. Место шишињата да завршат на некоја дива депонија и околните ниви што е честа слика тие ќе завршат за рециклирање. Освен од домот пластичните шишиња ги собрав и од каналите а за возврат добив круша. Сега ќе ја засадам во дворот и на внуците ќе има раскажам дека ова дрвце е од дадени пластични шишиња,, вели Заре Стојановски од Босилово

Општина Босилово во дел од населените места има поставени контејнери за складирање пластика, стакло а за наредниот перидо размислува и набавка на посебни садови за селекција на плaстиката.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.