Општина Василево со свечена седница го одбележа Денот на која свое обраќање имаше градоначалникот Славе Андонов кој подвлече дека е потребен ангажман од сите граѓани за да Општина Василево стане наш сигурен и просперитетен дом. Како што подвлече Општината се сака со дела и затоа сите нејзини граѓани, секој во својот делокруг на активности, во рамките на своите знаења и можности, секој во своето населено место, треба да се однесува одговорно и домаќински исто како во својот дом.
Ее во целот излагањето на граодначалникот Славе Андонов
,,Како прв човек на општината во овој период од околу две години, задоволство ми е заедно со сите вас да ги споделам придобивките, постигнувањата и резултатите што сите ние заедно ги постигнавме, а кои во пракса значат квалитативно подобрување на сите сегменти и услови во кои се одвива секојдневието на сите нас-граѓаните на општина Василево. Воедно тие се и континуитет во развојот започнат во 1996-тата и вклученоста и резултатите на сите мои претходници.
Од името на граѓаните на општина Василево и од мое лично име им изразувам благодарност за постигнатото во нивните мандати: километри изградени асфалтни локални патишта и улици на место на селските земјени и калливи; спортските игралишта и терени, на местата на празните полјани и селски ширини, на партерните и паркови разубавувања и се она што на општината и го смени ликот од типично неразвиена, рурална – во општина со елементи на урбано живеење.
Убавите денови се добар повод и причина да се сетиме на убавите работи кои заедно ги постигнавме, но уште поубав момент да погледнеме кон иднината онаква каква што сите си ја посакуваме за нас и нашите поколенија; Иднина во која ќе понудиме решенија за актуелните проблеми и прашања; Иднина во која најголем дел од проблемите во секојдневното живеење а кои се во надлежност на локалната самоуправа ќе бидат минато.
Зад мене како прв човек на општина Василево се околу две години во кои упорно, секојдневно со максимален ангажман на сите ресурси, согласно моите и надлежностите на локалната самоуправа работам на подобрување на условите во сите населени мести, на менување на целокупното опкружување и амбиент во кој се одвива секојдневието на моите сограѓани. Со визија за подобра иднина и идеи кои секојдневно ги црпам од граѓаните при моите секојдневни случајни или планирани средби, продолжувам да градам и инвестирам во општинскиот развој.
Домаќински и одговорно, уште од првиот ден, еден од моите главни приоритети беше и е, финансиската стабилност на општината – услов за непречено одвивање на тековното работење на општината и секако услов за планирање на развојот, кој е наш императив и неопходна потреба. Наследениот долг беше околу 100 милиони денари.Но долгот постепено го намалуваме ,а во исто време насекаде се гради. Нема населено место каде не е реализиран барем еден проект.Ова е повеќе од сигурен показател дека актуелните политики се вистински, одлуките исправни, а општината на вистинскиот пат; патот кој овозможува развој и сигурна реализација на планираните проекти.
А нив ги има многу: Во делот на локалната патна инфраструктура планираме асфалтирање на улици во речиси сите населени места. Истите се веќе утврдени во Програмата за локални патишта и улици за наредната година. Инвестиции и проекти се планирани и во делот на водоснабдувањето и третманот и одведувањето на отпадните води. Ќе го реконструираме системот за водоснабдување во Седларци. А како најактуелно и проблем на чие решавање тековно работиме и набргу ќе има завршница е реконструкцијата на филтер станицата Ташли баир со што конечно ќе го решиме прашањето со чиста и здрава вода за пиење за граѓаните на Василево, Ангелци, Градашорци и Едрениково.
Во делот на третманот на отпадните води по стартот на изградбата на системот за фекална канализација во населеното место Василево, за наредната година имаме планирано изградба и обезбедени средства за уште еден крак, како и еден крак во населеното место Ангелци.Работите се одвиваат со планираната динамика. Досегашната реализација на сите планирани активности, и тоа во услови на финансиска презадолженост е своевидна гаранција за 100% реализација на сите идни проекти.
Една од намерите на општина Василево и насоки во која сме почетници, но во иднина продолжуваме да се движиме, е зголемувањето на сопствените приходи преку продажбата на државно градежно неизградено земјиште и урбанизација, кои се сигурни извори на приходи. Со нивно реинвестирање ќе го подобриме и забрзаме развојот на секое населено место овозможувајќи им на граѓаните подобар живот во средината во која живеат.
Мојата цел од првиот ден како градоначалник останува непроменета: подобри услови за живот на сите мои сограѓани, од сите населени места, од сите професии, возрасни категории посебности или припадности….Но, водејќи се од онаа одамна познатата дека, „децата се нашата иднина“, прашањата поврзани со нив ги сметам како посебно важни. Обезбедувањата средства за детски забавни паркови, спортските терни или игралишта, се и ќе бидат моја главна преокупација како активности и проекти од исклучителна важност со кои се разубавува и квалитативно менува детското секојдневие. Годинава на мое огромно задоволство, а се надевам и на задоволство на родителите, за сите првачиња кои настава посетуваат во основните училишта на општината, обезбедивме еднократна парична помош, како олеснување на стартот на учебната година.
Тие се иднината на општина Василево и затоа ќе продолжиме да вложуваме и инвестираме во областите кои се специфични токми за нив.
Спортот и спортските настани, културните манифестации и активности, одбележувања на настани, чествувања на личности и понатаму ќе го имаат заслужениот третман и внимание, бидејќи на тој начин сите ние духовно јакнеме како индивидуи, а со тоа и заедницата во целост.
Почитувани присутни,
Денес, кога го славиме Денот на нашата општина, сакам да упатам и една порака: Општината се сака со дела. Затоа сите ние нејзините граѓани, секој во својот делокруг на активности, во рамките на своите знаења и можности, секој во своето населено место, треба да се однесува одговорно и домаќински исто како во својот дом. Општината е дом на сите нас. И само со добро планирање, многу залагање, континуирана работа и вклученост на сите жители од напредокот на овој наш заеднички дом е сигурен.
Нека ни е вечна општина Василево.
Да сте ми сите живи и здрави.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
