,,Мултус’’ од Гевгелија со комични и едукативни видеа и филм со средношколци, ќе го буди сомнежот дали веста е вистинска

754

„Сите вистини на веста“ е насловот на проектот што ќе го спроведува Центарот за едукација, култура и активизам ,,Мултус’’ од Гевгелија со кој ќе се обиде го потикне сомнежот и претпазливоста кај јавноста при примање вести и секојдневни информации од медиумите. Станува збор дел од националниот проект „Со критичко мислење до граѓани со медиумска писменост“, што го спроведува Фондација Метаморфозис и Еуротинк – Центар за Европски стратегии а го финансира Европската унија.

Како што не информираше Лиле Танчева од Центарот ,,Мултус’’ ќе бидат изработени 4 комични видеа со познатиот стенд – ап комичар Дејан Малзарков и неговите ликови и исто толку едукативни видеа, кои ќе ја објаснат пораката на снимените ,,скечеви’’. Проектот предвидува и краток, аматерски  филм во кој ќе учествуваат средношколци од СОУ „Јосиф Јосифовски“ Гевгелија кои сами ќе го изработат со камера, продукција и глума.

,,Се надеваме дека ќе допреме до фини бројки на гледаност, но и на разбраност. И дека барем малку ќе се разбистри матната слика која ја создаваат медиумите со бомбардирањето информации, кои неретко немаат никаква новост, а ни поента. Исто така се надеваме дека ќе почне да се прави разлика меѓу критичко мислење и негативна критика, модерно кажана „хејт“, бидејќи тоа не е воопшто исто. Критичкото мислење бара аргументи и факти во она што го слуша, чита, гледа, додека негативната критика или произлегува од недостаток на агументите или има свои аргументи зошто е негативно критикувано’’, објаснува Лиле Танчева од ,,Мултус’’

Во проектот ќе бидат вклучени гевгелиската Телевизија Нова, Радио Тајм ФМ, информативниот портал Дрнка.МК кои ќе бидат медимски партнери преку кои ќе се емитуваат видеата и филмот со цел да се пренесе пораката за внимателност при читање, слушање и гледање на информативни вести и секогаш да има критичко мислење со аргументи и факти

 

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.