Општинскиот кризен штаб на Гевгелија бара воведување полициски час на територијата на Општината во периодот од 21:30 часот до 5 часот наутро и враќање на претходните рестриктивни мерки и примена на мерките за заштита од ширење на ковид-19 од страна на општинските и државните интситуции, стопанските капацитети и сите економски оператори. Ова се заклучоците од состанокот на ова тело кое расправаше откако се влоши епидемиолошката состојба во општина Гевгелија
Од 1 до 4 март во општина Гевгелија според Институтот за јавно здравје регистрирани се 113 позитивни а за последната недела од месец февруари на територијата на ова општина за 7 дена беа регистрирани 96 новозаболени, што значи дека за последните десетина дена во Гевгелија се регистрирани над 200 позитивни
Како што посочуваат од Кризниот штаб, времено се затвораат детските игралиште, се забрануваат групирања на јавни површини во Општината, во туристичките места Смрдлива вода и Негорски бањи како и во планинските села Конско, Серменин и Ума.
Инаку на состанокот беше констатирано дека состојбата во Општата болница во Гевгелија станува критична, поради напливот од огромниот број на новозаразени пациенти од Ковид 19, поради што се чека на ред за болничко легло. Во новоотворениот модуларен Ковид центар во Гевгелија сите болнички легла се зафатени, како и во тријажниот центар. Од друга страна, можноста за ротирање на здравствените работници е ограничена, бидејќи бројот на здравствените работници е преполовен.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
