Жителите на Стојаково од Општина Богданци ќе покренат иницијатива штрковите да им станат заштитен знак и бренд бидејки последниве години значително се зголеми бројот на овие птици преселници. Во селото речиси и да нема електричен столб каде нема гнездо и мали штркови кои почнаа да прават гнезда и по покриви на објекти.
Ако во 2018 та во Стојаково биле регистрирани 37 гнезда со 74 возрасни и 134 млади штркови ова година како што вели Роберт Иванџиков се евидентирани 45 гнезда, 90 возрасни и 153 млади штркови кои овие денови ги прават првите летови. Иванџиков вели дека овие птици бараат чиста и еколошка средина со многу ливади а токму атарот на ова село изобилува со чиста и богата со храна средина
,,Штрковите населуваат еколошки чисти средини, што значи дека Стојаково максимално ги исполнува нивните услови за живеење. Селото Стојаково е рамничарско село и има две големи предности: прво, има доволно безбедни места за гнездење речиси повеќето од гнездата се на далноводи, на кои често има платформи за штркови поставени од „ЕВН Македонија“, и второ, околните обработливи површини, близината на Вардар и влажните ливади околу локалитетот Ѓол и Ѓиренот нудат доволно храна за штрковите. Тоа се доволни предиспозиции за штрковите да имаат растечка и самоодржлива гнездечка популација во селото,, напиша Иванџиков од месната заедница на Стојаково.
Стојаково е во непосредна близина на македонско-грчката граница и брои околу 400 домакинства. Постарите велат дека своевремено во ова село имало по две до три гнезда на штркови, но бројката од 37 гнезда и вкупно 208 штркови пријатно ги изненадила сите.
„Сакаме да останат бидејќи ни го чистат селото. Да ги видите кога се ора некоја нива. По 30-тина слетуваат и ги собираат инсектите, глодарите и влекачите. Каде има штркови има мир и чистота, нè учеа постарите. Така што, добро е што ги има во толкав број. Догодина верувам дека ќе ги има уште, ако треба и ние ќе подигнеме столбови за гнезда“, велат жителите на Стојаково, одалечено 10-тина километри од Богданци.
Фото: МЗ Сојаково
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
