Ансамблот „Мегдан“ од Богданци ќе го престави македонскиот изворeн фолклор на Фестивал во Португалија !

2459

Фолклорниот ансамбл за традиционална музика и игри „Мегдан“ од Богданци од 31 јули до 6 август ќе биде дел од Меѓународното фолклорно биенале на Алфена во Португалија каде ќе земат учество  фолклорни друштва и ансамбли од неколку европски држави. Станува збор за учество кое „Мегдан“ требаше да го реализира пред три години, но заради Ковид кризата конечно ќе можат да го престават македонскиот фолклор пред голем број посетители и фолклорни друштва.

„ На фестивалот за секоја вечер има планирано различни случувања, запознавање со културата, фолклорот и кујната на другите земји кои учествуваат. „Мегдан“ ќе се претстави со изворни македонски ора и песни во живо со оркестар. Среќни сме што имаме можност да ги запознаеме и другите земји од светот со нашиот богат фолклор и традиција и да покажеме дека ова мало парче земја со себе носи големи вредности.“ ни изјави Радмила Гошевска една од првите членови на Мегдан задолжена за односи со јавност

Ансамблот од своето основање е член на Сојузот на фолклорни ансамбли на Македонија, кој е официјален партнер со CIOFF. Фолклорниот ансамбл за традиционална музика и игри „Мегдан“ во изминатите години постигна забележителни резултати и успеси во народното творештво и претставување, како во земјава, така и на меѓународната сцена.

Мисијата на ансамблите, како што е „Мегдан”, е да ја зачуваат „свежината и изворноста”, затоа што фолклорот не само што треба да се сака, туку треба и да се разбере.Минатата година ансамблот одбележи 10 години од своето постоење со голем концерт во Богданци со наслов „НИШКА ПО НИШКА ЃЕРДАН”

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.