Младата Ангела Маџирова – ANGIE неодамна објави нова авторска песна насловена како “Whistling Of The Wind” која е комбинација на рок и алтернативната со етно македонската музика. Таа претходно го има објавено својот прв албум “Bitter Blues” во која се јавува и како автор и како интерпретатор. Новата песна е во продукција на Кол Хатчинсон а е снимена со помош на бенд од како што вели Маџирова – преталентирани музичари од Доминиканската Република, САД, Словенија и Индија
Дрнка.МК: Angie објавивте нова песна – ќе може ли накусо да ни објасниш за каква песна станува збор и од каде е инспирацијата
Angie: “Whistling Of The Wind” е мојата нова авторска песна, љубовно писмо за мојот роден град, Богданци. Ги опишува убавините и прекрасната енергија на нашиот прочуен ветар и колку навистина недостасува кога сме далеку од дома. Песната е напишана во седум-осмински такт, што е карактеристично за нашата македонска народна музика, а покрај ритамот, се инспирирав и од традиционални мелодии од нашите песни. “Whistling Of The Wind” претставува комбинација на рок и алтернативната музика со етно-македонската; мост кој ги спојува западните и источните стилови и ја носи македонската традиционална музика поблиску до места каде тоа е невообичаено.
Дрнка.МК: Кој беше мотивот да се напише таква песна?
Angie: Песната ја напишав како дел од вежба на предавање “Клавирски техники за композитори на песни“. Импровизирајќи на клавирот, забележав дека всушност свирам во седум осмини и оттаму песната едноставно се “напиша сама“. Ја напишав во период кога се немав вратено во Богданци повеќе од 10 месеци, па беше лесно стиховите да ги напишам токму за моето родно место. Продукцијата е заедничко дело на мене и мојот долгогодишен соработник, Кол Хатчинсон, а имав и помош од мојот бенд – преталентирани музичари од Доминиканската Република, САД, Словенија и Индија кои одвоија време да снимаат на “Whistling Of The Wind”.
Дрнка.МК: Каде е Ангела и што спрема?
Angie: Во моментов сум на последна година студии и се подготвувам за ново поглавје во мојот живот. Работам на финални проекти, спремам нови концерти и настапи на пролет и лето а и учество на “Интернационален Фолк Фестивал“ во Февруари на факултетот кадешто ќе ја претставувам Македонија и македонската музика. Работам на кариерата и во полето на музиката за визуелни медиуми преку предавања, проекти и други активности како и во индустријата за мјузикли. Во почетни фази сум и во пишување, продуцирање и снимање на албум, кој се надевам ќе биде готов до крајот на 2026-та година и ќе вклучува песни на англиски и на македонски јазик. (В.Т.)
photo credits: Thoughts By Elia
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
