Не беше потребно да се мислам дали ова што се случува во Украина е мировна операција. Ова е војна. Сакам руските граѓани да ме чујат – сакам да научат како изгледа пропагандата, изјави руската новинарка Жана Агалакова
Сè повеќе има руски новинари кои даваат откази од работните места, поради промовирање лажни наративи во врска со Украина од страна на нивните медиумски куќи.
Последен беше случајот со поранешната дописничка од Париз за Европа на руската државна телевизија Канал Еден, Жана Агалакова, која гласно проговори за руската пропаганда.
Воопшто не се мислев дали да продолжам да работам. Исто така, не беше потребно да се мислам дали ова што се случува во Украина е мировна операција. Ова е војна. Сакам руските граѓани да ме чујат – сакам да научат како изгледа пропагандата и да се научат да се информираат од други извори на информации. Не сакам луѓето повеќе да бидат зомби, рече таа.
Сепак, таа изрази стравување дека ќе биде обвинета од Русија дека е „високо платен шпион“. Агалакова (56), која претходно ги водеше вестите, изјавила дека верува дека на руските медиуми им било наредено од Кремљ да емитуваат лаги и пропаганда со години, оставајќи им малку простор на независните медиуми.
Во вторникот, руските власти објавија дека познатиот новинар, Александар Г. Невзоров, е под кривична истрага поради објава за руското бомбардирање на Мариупол на неговиот профил на Инстаграм.
Пред неколку дена, пак, Марина Овсијаникова, уредник на државната телевизија Канал 1, објави антивоен знак на кој пишува „Стоп за војната!“ и го прекина преносот на ноќните вести, во живо, велејќи: „Те лажат овде“!
Лилија Гилдеева, водител на државниот канал НТВ, исто така, поднесе оставка. Таа работеше за медиумот од 2006 година. Со неа си замина и Вадим Глускер, новинар кој во НТВ работеше речиси 30 години.
Откако претседателот Владимир Путин ја донесе одлуката за инвазија врз Украина, Дмитри Ликин исто така даде отказ како долгогодишен уметнички директор на Канал 1, руската државна телевизиска мрежа, која е главен играч во распространетиот пропаганден апарат на Кремљ. Тој изјави дека „не е политичар“, и дека инвазијата ќе значи дека тој треба да биде дел од операција со агенда за „уништување животи“.
Во меѓувреме, руските пратеници одобрија нов ригорозен закон. „Њујорк Тајмс“ ова го коментираше како:
Последен обид да се сее страв меѓу критичарите на војната пред спроведувањето на тој закон со кој ќе следува дури 15 години затвор за било какво отстапување од официјалниот наратив за она што Кремљ го нарекува „специјална воена операција“ во Украина.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
