Македонската квиз-репрезентација од денеска до недела учествува на Светското првенство во квиз што се одржува во Сараево, Босна и Херцеговина. Дел од македонскиот тим е и струмичанецот Митко Димитровски, со што Струмица има свој претставник на ова големо меѓународно натпреварување. Освен Димитровски учествуват и Илија Цветков, Бари Исени, Мартин Мајк Петрески, Стефан Јаковчевски и Стефан Стошиќ.
Сите тие се членови на Македонската квиз-асоцијација (МКА), кои ќе се натпреваруваат во неколку дисциплини – екипно натпреварување на националните тимови во сениорска конкуренција и категоријата до 30 години, како и во поединечна конкуренција. Ова е можност и македонските квиз-натпреварувачи да го покажат своето знаење, подготвеност и натпреварувачки дух на светската сцена.
На првенството во Сараево се очекува учество на голем број познати квиз-натпреварувачи од регионот и светот. Меѓу нив се и познатите хрватски квиз-мајстори Дин Котига и Крешимир Меџерал Сучевиќ, кои на јавноста ѝ се познати како ловци во популарниот хрватски телевизиски квиз „Потјера“.
Учеството на Митко Димитровски е повод за гордост за Струмица, која преку него има свој претставник меѓу натпреварувачите од вкупно 17 различни земји.Во следните денови тој и македонскиот тим ќе ги одмерат силите со квиз-екипи и поединци од повеќе земји, на натпреварување што ги обединува љубителите на знаењето, општата култура и квизот.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
