Левица изрази целосна поддршка за струмичките земјоделци кои протестираат поради, како што велат, ниските откупни цени на пиперката „куртовска капија“.Од партијата посочуваат дека земјоделците за килограм пиперка во моментов добиваат понудена цена од 25 денари, што, според нив, не ги покрива трошоците за производство. Тие нагласуваат дека земјоделците со месеци вложуваат средства и труд, при што сами го преземаат ризикот од производството.
„Зад секоја нива стои семејство кое живее од земјата, а зад земјоделството стојат цели локални економии“, велат од Левица, посочувајќи дека намалувањето на домашното производство може да доведе до напуштање на земјоделските површини, иселување на младите и зголемување на увозот на храна.
Од Левица велат дека, во услови на зголемени производствени трошоци, државата треба да преземе мерки за заштита на земјоделците и обезбедување услови за продолжување на производството.Партијата упати и повик до министерот за земјоделство Серафимовски, од кого очекува конкретно решение за барањата на земјоделците, наместо, како што наведуваат, само разговори и ветувања.
Инаку земјоделците од Струмичко бараат откупна цена од 50 денари за килограм за прва класа, 40 денари за мешана прва и втора класа и 20 денари за втора класа. Меѓу нивните барања се и фиксни откупни цени за целата сезона, навремена исплата на предадениот род и исплата на заостанатите субвенции. Тие три дена протестираа во знак на револт од понудената цена од 25 денари за килограм за конзервно преработувачките капацитети
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
