Зошто руската Спутник вакцина уште не е признаена во Австралија?

294

Во пресрет на тенискиот турнир Австралија Опен, стана јасно дека некои од тенисерите вакцинирани со две дози Спутник вакцина, од рускиот производител Гамалеја Истражувачки Институт, нема да може да учествуваат на турнирот, затоа што оваа вакцина Австралија не ја признава

Русинката Наталија Виклијанцева на Твитер објави дека го откажува учеството, затоа што не ѝ се признаваат двете дози руска вакцина Спутник кои ги примила.

Засега во Австралија се признаваат вакцините на Фајзер, Астра Зенека, Модерна и Џонсон, но може да се патува и со две примени дози од Синовак и Синофарм.

Во што е проблемот, зошто Спутник има потешкотии да биде признаена на Запад?

Проблемот не е само во Австралија. И Европската агенција за лекови (ЕМА) и Светската здравствена организација (СЗО) уште ја немаат признаено Спутник В вакцината. Рускиот производител на Спутник В требаше да ги достави сите најнови информации од своите клинички тестирања до СЗО до крајот на декември. Во овие информации СЗО очекуваше да влезат и локациите каде се наоѓаат производствените капацитети за да може да им се направи инспекција до крајот на февруари 2022 година. Москва побрза да ја одобри својата вакцина за домашното население и извезена беше во многу земји ширум светот, но не е уште сертифицирана, ниту од СЗО, ниту од ЕМА, европскиот регулатор за лекови.

Кога Институтот Гамалеја од Русија ќе ги достави сите документи и целата апликација, која се состои во два дела, СЗО ќе пристапи кон нејзино разгледувањерече Роџерио Гаспардиректор на СЗО на брифинг во Женева кон крајот на декември 2021.

И Русите признаваат дека имаат различно разбирање на стандардите за производство на вакцина од оние на СЗО и дека не успеале првично да ги исполнат барањата. Откако во престижното медицинско списание Лансет беше објавено дека вакцината Спутник В има ефикасност од 91.6 проценти, повеќе држави почнаа да ја употребуваат оваа вакцина на своја одговорност и тоа трае веќе една година, период во којшто вакцината уште не е авторизирана од меѓународните регулатори, но и националните регулаторни агенции за лекови на многу земји.

Уште не сме доставиле некои од информациите зашто имавме различно разбирање што треба да испратиме и различни стандарди, рече Дмитри Песков, портпарол на Кремљ.

Во септември, официјално лице на СЗО, Џарбас Барбоса, на конференција истакна дека производствениот процес на Спутник В не ги задоволува потребните стандарди и затоа на чекање е апликацијата за Спутник да добие авторизација од СЗО.

Додека се вршеше инспекција во еден од производствените капацитети, каде се произведува вакцината, пронајдено е дека овој објект не е во согласност со најдобрите практики за производство. Производителот треба да го земе ова предвид, па да се направи нова инспекција откако ќе се осигураме дека фабриката е според стандардите, рече Барбоса.

Најрано кога СЗО ќе направи инспекција на фабриките каде се произведува Спутник В е февруари 2022, доколку компанијата ги достави сите потребни документи. И на европскиот регулатор ЕМА ќе му биде потребно барем до првата четвртина на 2022 година за да ја одобри Спутник В. Неименуван извор за Ројтерс посочил дека во документацијата што рускиот производител ја доставил до ЕМА недостасувале податоци.

 

Можеше ли руската тенисерка Виклијанцева, сепак, да учествува на Австралија Опен?

Објавата на руската тенисерка Виклијанцева некои ја протолкуваа како согласување со стандардите за прифатлива вакцинација, кои ги има Австралија, а други како политизација и продавање патриотизам. Твитот на руската тенисерка, иако популарен на Твитер, не доби широко меѓунардоно внимание сè додека на виделина не излезе случајот со Новак Ѓоковиќ, кому му беше одземена австралиската виза од тамошните власти и чија разрешница се очекува од австралиските судови. Но, после овој случај со Ѓоковиќ, твитот на Виклијанцева доби широко внимание во светот, но, донекаде и во земјава. Реакциите под нејзиниот твит се поделени. Има такви кои сметаат дека проблем е фактот што Спутник В нема меѓународна верификација, но, голем број реакции се ставаат и на страна на спортистката, барајќи и неа и на сите други тенисери да им се дозволи да учествуваат без оглед на нивниот вакцинален статус. Не е мал и бројот на оние кои сметаат дека и во овој твит меѓународната геополитика ги вмешала прстите и дека е постиран токму од такви причини. Се отвора прашањето дали руските спортисти, вакцинирани со Спутник В, сега нема да учествуваат на спортски натпревари организирани во западните земји (кои главно сè уште не ја верифицирале руската вакцина), притоа изложувајќи се и себеси и своите тимови на финансиски загуби.

Досега 73 држави го прифатија вакциналниот сертификат издаден за две примени дози од Спутник В вакцината. Сепак, на листата ги нема најголемиот дел земји од Западна Европа, САД и Канада, како и редица други земји ширум светот. Секој патник треба да провери какви се правилата во државата каде што има намера да патува.

И на крајот, треба само да се напомне дека Виклијанцева можела лесно да се вакцинира со трета бустер доза вакцина од брендовите верифицирани во западните земји, на пример со Џонсон вакцина, која се прима преку само една доза (за разлика од останатите ковид вакцини, за кои се потребни две дози за лицето да се смета вакцинирано) и така да може да учествува на Австралија Опен.

Засега влез со две дози Спутник В вакцина е дозволен во Албанија, Алжир, Ангола, Аргентина, Арменија, Азербејџан, Бахраин, Бангладеш, Белорусија, Боливија, Босна, Бразил, Камбоџа, Камерун, Чиле, Хрватска, Кипар, Еквадор, Гана, Грција, Гватемала, Гвинеа, Хондурас, Унгарија, Индија, Индонезија, Иран, Ирак, Јордан, Казахстан,Кенија, Лаос, Либан, С. Македонија, Малдиви, Мали, Мексико, Маврицис, Молдавија, Црна Гора, Мароко, Мјанмар, Намибија, Непал, Никарагва, Нигерија, Оман, Пакистан, Палестина, Панама, Парагвај, Филипини, Руската Федерација, Сан Марино, Србија, Словачка., Словенија, Шри Ланка, Сирија, Тунис, Турција, Туркменистан, Обединети Арапски Емирати, Узбекистан, Венецуела, Виетнам и Зимбабве.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.