Зависници од психоактивни супстанци, алкохол и дрога од Југоистокот освен што ќе се рехабилитираат во Струмица ќе стекнуваат и работни вештини за полесна ресоцијализација и интеграција во општеството. Ова го овозможува проектот „Академија за реинтеграција на маргинализирани лица“ што го имплементира Центарот за развој на Југоисточниот плански регион со Здружението за советување, лекување, реинтеграција и ресоцијализација на лица зависни од психоактивни супстанци ,,ИЗБОР’’ од Струмица, финансиска поддржан од Швајцарската агенција за развој и соработка и Министерството за локална самоуправа
Токму овој проектот на Здружението ,,Избор’’ доби најголема поддршка на регионалниот форум за социјална инклузија кој се спроведе на почетокот на годинава, за што им беа одобрени средства во висина од над 6 милиони денари. Со овие средства набавена е опрема, потребна за работно оспособување за пекарство, пакување на производи, градинарство и цвеќарство. На тој начин се очекува збогатување на програмата за реинтеграција на зависниците со стекнување на вештини на професионално оспособување за маргинализирани лица.
,, Проектот нуди можност за професионална рехабилитација заради реинтеграција на маргинилизираните лица. Проектот предвидува голем број активности преку кои ќе се обидеме не само да ги вработиме овие лица, туку и да ја направиме нашата организација самоиздржлива’’, рече Сократ Манчев од Здружението ,,Избор’’
Проектот ќе овозможи унапредување на постоечките услуги во југоисточниот регион за подобро вклучување на маргинализираните лица на пазарот на трудот. Според заменик министерот за локална самоуправа Зоран Димитровски кој ја посети локацијата каде зависниците стекнуваат професионални работни вештини, ова Академија ќе биде пример и за другите региони во земјава
,,Ова е оригинален пример како да им се помогне на оние кои се зависници, на начин на кој тие ќе бидат ресоцијализирани, не само лекувани. Токму тука не само што се рехабилитираат зависниците од психоактивни супстанци туку и работат, се социјализираат, и на тој начин стануваат активни на пазарот на трудот. Овој пример треба да се преслика во други региони во државава каде што исто така постои проблемот на зависности, рече заменик министерот Зоран Димитровски
Според градоначалникот Струмица Коста Јаневски ова е уште една успешна приказна во рамките на општината, која со голем дел е потпомогната од Швајцарската Амбасада.
,,Овој проект е успешна приказна за општината, така што се повеќе е препознаен во нашата држава и по чии тек и други региони заинтересирани се обидуваат да создадат една таква комуна која што преку работна ангажираност се прави реинтеграција на луѓето кои што се во одреден ризик од одредени зависности, да се вратат во општеството’’ рече Јаневски
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
