„Музичката приказна со свои зборови“ на бендот YU FOR YOU од големата сала при НУЦК „Антон Панов“ во саботата продолжи и во „Рекорд Паб“ во Струмица. Таму гитаристот Зоран Трендов пред своите колеги, блиски и подржувачи на бендто клекна на песната ,,Дали знаш да те волим“ во интерпретација на Иван Кукиќ и за сопруга ја побарал Елисавета – ќерката на Горан Алиќ инаку негов музички колега.
„Моментот се случи сосема спонтано, веднаш по концертот — во еуфорија, исполнет со огромна енергија и опкружен со луѓето што најмногу ги сакам. По концертот бевме на коктел во „Рекорд Паб“, кога одеднаш почувствував дека тоа е вистинскиот миг да ја запросам. Без многу размислување им кажав на Иван, Стојан, Марјан и на останатата екипа ,што ми е во мислите. Во тој момент Иван ја запеа „Дали знаеш да те волим“и јас клекнав. Бидејќи сè беше целосно непланирано, немав прстен со себе. Единственото нешто што го имав во џебот беше slide за гитара, па токму него го искористив како симболичен прстен и така ја запросив“, раскажа за Дрнка МК портал Зоран Трендов
Вели дека имал трема но ја потиснал со силната емоција и енергија што ја носел во себе од концертот. По чинот, забавата траела до раните утрински часови кога сите присутни се забавувале и ја споделиле радоста со младенците. Зоран вели дека Ели му е силна поддршка во музиката.
,,Ние сме заедно 4 години и 4 месеци, а низ целиот тој период таа ми е најголема поддршка. Иако е забен техничар по професија, има одлично чувство и разбирање за музика, бидејќи е израсната во музичко семејство и многу добро знае како функционира целиот тој свет. “ вели Трендов кој призна дека неговиот ,,дедо“ Горан Алиќ е многу поискусен и еден од најдобрите и најценeтите гитаристи на овие музички простори.
Зоран Трендов вели дека концертот на YU FOR YOU во саботата поминал онака како што посакувале. Излегле со полно срце и искреност пред струмичани и успеале да пренесат силни емоции и одлична енергија кон публиката.
„Реакциите и коментарите од публиката беа навистина прекрасни и ни оставија чувство дека вечерта беше посебна на секој можен начин“ заврши Трендов кој е син на Наце Трендов гитарист на поранешната група „Пицикато“
В.Трајков фото/ФБ приватна архива
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
