Вкупно 12 млади интерпретатори од целава земја ќе бидат дел од вториот возобновен Фестивал на млади таленти ,,Смотра – Златен глас 2026“ кој се одржува во населеното место Сушица Општина Ново село. Станува збор за пејачи аматери кои полека се пробиваат на македонската музичка естрада со своите вокални способности. Според објавите на социјалните мрежи годинава на фестивалот ќе настапат учесници од Струмица и регионот, Скопје, Битола, Македонски Брод, Виница, Прилеп.
Младите таленти подржувани од групата „Легато Бенд“, ќе се докажуваат пред жирито во состав Сузана Гавазова која потекнува од Сушица, Миле Кузмановски, Роберт Саздов и Драги Станков. Впрочем овие музички имиња треба да одлучат кој ќе биде победникот кој годинава ќе добие своја песна и снимање во професионално студио.
Од Струмица на Смотрите во Сушица ќе настапат Кире Ефтимов, Никола Делевски, Стефанија Ичковска и Мартина Митева. Од Битола Санела Шукриевска и Никола Зацески, од Виница Јани Тасева и Горан Петков. Пред жирито ќе пее и Андреј Цаневски од Скопје, Марија Јаковлевска од Прилеп.
Пред присутната публика натпреварувачите ќе се престават со македонски фолк и забавни песни но и песни од странската музичка сцена. Фестивалот започнува во 20 часот на училишниот двор во Сушица.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
