Почитување на законските правила и пописи за однесување во шума, размена на информации за можно ловокрадство, бесправна сеча на огревни дрва, појава и превенција од пожари. Ова беа темите на состанокот што го иницираше првиот човек на ЛД Беласица од Струмица Зоран Ристов а на кој присуствуваа преставници на сите ловни друштва од струмичко но и преставници на институции и доброволни противпожарни друштва.
Како што не информираше Ристов, целта на состанокот е да се најдат механизми и начини за поголема соработка и координираност помеѓу сите чинители кои директно или индиректно се поврзани со шумите но и размена на информации со цел да се превенира од штетни појави но и да се соработува за унапредување и заштита на природата.
,,На состанокот се разговараше за претстојната ловна сезона, со посебен акцент на почитување на законските прописи и правилата, зголемување на активностите на сите засегнати страни, како и засилени контроли во делот на користење на оружје и управување со ловечки кучиња (загари). Исто така, беше договорено продлабочување на соработката со Доброволните противпожарни друштва, како и континуирана размена на информации со цел навремено спречување на негативни појави како што се ловокрадство, бесправна сеча на шуми и предизвикување пожари“, соопшти Зоран Ристов претседател на ЛД Беласица
На состанокот учествувале претставници од ловните друштва „Скорош“ од Куклиш, „Фазан“ од Василево, „Гоце Делчев“ од Босилово и „Елен“ од Ново Село, како и претставници од СВР Струмица, ЈП „Македонски шуми“ – ПСШ „Беласица“, Агенцијата за храна и ветеринарство, Стационар „Лана“, Ветеринарната амбуланта „Цвет“, Дирекцијата за заштита и спасување, Центарот за управување со кризи и Доброволните противпожарни друштва од Струмица, Василево и Ново Село.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
