Видеоматеријал на Фејсбук дезинформира дека спајк протеинот во вакцината е опасен и предизвикува смрт

504

Tврдењата за опасноста на спајк протеинот и неговата поврзаност со вакцината, изнесени во видеоматеријалот што се споделува во оваа објава, ги оценуваме како невистинити. Голем број медицински извори укажуваат дека спајк протеинот во вакцината не е ист како тој на коронавирусот и истиот е во многу мали количества, а телото го отстранува без последици откако ќе се создаде имун одговор. Во објавата погрешно се интерпретира научна студија. Според коавторот на студијата, присуството на минорни количества спајк протеин не значи дека мРНК вакцините имаат потенцијал да предизвикаат сериозна штета

Рецензираме пост на Фејсбук во којшто се вели, дека извесен доктор Рајан Кол докторант по вирусологија и патологија, ќе објасни сè за ковид-19, наместо „политичките научници и платените ботови.“ Во склоп на оваа најава, има и придружен видеоматеријал, каде доктор Кол зборува на тема ковид-19.

Најпрво на почетокот на излагањето тој тврди дека „маските се обични крпи и не штитат“. Но, анализата на 172 истражувања направени во 16 земји покажува дека мерките како физичко растојание и носење маска го намалуваат ширењето на коронавирусот.

СПАЈК ПРОТЕИНОТ И ВАКЦИНАТА – ПРОИЗВОЛНО ТОЛКУВАЊЕ

Од 00.40-02.20 мин. од видеото докторот го дава следното мислење:За што се работи со вакцините и смртните случаи? Гледаме наслови дека дете починало по вакцинација на 13 години, или дека 15 годишно дете умрело неколку дена после вакцинацијата со „Фајзер“ од срцев удар. Или 10 смртни случаи кај деца пријавени на ВАЕРС. Што се случува со спајк протеинот? Тој спајк протеин не останува само во рамото туку циркулира во вашата крв. Завршува во повеќе органи од вашето тело. Кога на животни во лабораторија им го вбризгуваме спајк протеинот без телото на вирусот тој предизвикува иста болест како ковид-19. Истите болести на срцето, на белите дробови, кардиоваскуларниот систем. Спајк е токсин. Зошто во луѓето вбризгуваме токсин?Потоа од 02.20-02.29 мин. тој споредува 2 фотографии од митохондрии во клетките и тврди дека тие без вакцина се глатки, а по вакцината се растурени и фрагментирани и вели дека тоа се случува поради вакцината, а не поради ковид.Во 3-та минута од видеото тој дополнува дека спајк протеинот циркулира во телото 2 недели, а можеби и подолго.Слушаме дека некои умираат многу брзо по примена вакцина. Две или три недели по вакцина. А тој спајк во ова време циркулира и се трудат ова да ни го сокријат. И велат не е од вакцината зашто поминало време по нејзината апликација, ама спајкот уште циркулира во телото. Спајк протеинот предизвикува оштетување на белите дробови, вели докторот во 03.10-03.30 мин. од видеото.

Во 3.52 мин. вели дека по вакцината се создава болест во која сопствениот имун систем се напаѓа себеси.

Во 4.10 мин. докторот продолжува и вели дека вакцината не е вакцина туку експериментална терапија, за која е дадена итна авторизација. Во 4.28 мин. тврди дека спајкот во мозокот создава инфламација поради која се создава магла, исто така, во мозокот, како и кај ковид пациентите. Во 5.08 мин. тој тврди дека кај децата се создава запаление на срцето од спајк протеинот во вакцината, по што имуниот систем го напаѓа вашето ткиво.

ПОГРЕШНА ИНТЕРПРЕТАЦИЈА

Но, сето ова погоре, претставува погрешна интерпретација на научна студија!

Станува збор за оваа студија, која се однесува на здравствени работници вакцинирани со вакцина на „Модерна“. Во студијата детектиран е спајк протеин во крвта на 11 од 13 учесници.

Коавторот на студијата кажува дека таа не сугерира оти ковид вакцините се штетни, туку дека таа е на погрешен начин интерпретирана. Дејвид Р Валт, експерт во дијагностичко тестирање на патологија во Бостон Масачусетс, вели дека студијата во која е коавтор имала како цел да види дали истражувачите може да користат ултрасензитивен тест за да детектираат циркулирачки антигени продуцирани од мРНК вакцината.

Најдовме дека можеме да детектираме исклучително ниски нивоа и концентрации на С1, субединица на спајк протеинот во 11 од 13 здрави вакцинирани индивидуи, и целосниот спајк протеин во 3 од 13, изјавил тој за Асошиејтед прес.

Но, додал дека присуството на минорни количества спајк протеин не значи дека мРНК вакцините имаат потенцијал да предизвикаат сериозна штета.

Најдовме дека за неколку дена од појавата на антигенот, индивидуите развиваат антитела кои го отстрануваат антигенот од крвотокот. Нашиот заклучок е дека вакцината функционира како што требадодал тој.

СПАЈК ПРОТЕИНОТ ПО ВАКЦИНАТА НЕ Е ИСТ КАКО ТОЈ НА КОРОНАВИРУСОТ

Професорот на Медицинскиот факултет, доктор Драган Даниловски за „Вистиномер“ претходно изјави дека спајк протеинот што се создава по вакцината не е ист како тој на коронавирусот.

Инструкцијата за неговото производство во форма на мРНК, доаѓа само во цитоплазмата односно рибозомот, а не во јадрото на нашите клетки. И тој спајк протеин што ќе го произведе клетката, (рибозомот, т.н. фабрика за протеини), воопшто не е ист со оној на вирусот. Автоматски не ги поседува ниту својствата на оригиналниот спајк протеин. Тој само „личи“ на оригиналниот и има само антигено својство – да провоцира имун одговор. Дури и кога би бил сосема идентичен со оригиналниот спајк протеин (а не е), овој што се произведува со давање на вакцината е во 100.000 пати помала концентрација од онаа што ја произведува вирусот самиот, потребна да направи штета, објасни професор Даниловски.

Наспроти твредњето во постот, испитувањето на биодистрибуцијата на мРНК не е доказ за масовен експеримент врз луѓето, со однапред познати негативни последици. Еве еден пример за испитување на биодистрибуцијата на мРНК, кое е познато на Европската медицинска агенција ЕМА и кое покажува дека мРНК се чисти од организмот и од сите органи без последици.

Многу експерти се изјаснија околу протеинот од вакцините. Доктор Едвард Ниренберг демонстрира дека количината на спајк протеин што ја создаваат вашите клетки после вакцинацијата, е 100 илјади пати помала од нивото на спајк протеин во вирусот, кој предизвикува штета. Исто така, овој спајк протеин, создаден од вашите клетки, не е истиот како вирусниот спајк протеин!

За тврдењето дека ,,спајк протеините циркулираат во крвотокот напаѓајќи ги јајниците, невролошките ткива, други органи”, канадските лекари пишуваат:

Антивакциналните теории дека спајк протеините создадени по вакцинацијата можат да донесат катастрофа, не земаат предвид дека спајк протеинот на вакцината е поразличен отколку во неговата природна форма, дека неговата инженирана форма превенира тој да се активира и дека единствената намена му е да го активира имунитетот од вакцината.

Доктор Давид Горски, на пример, во детали објаснува дека вакцината против ковид-19 може да штити не само од инфекција со Сарс Ков 2, туку и против повреди од спајк протеинот!

мРНК или аденовирусот од вакцината не се дистрибуира екстензивно, затоа што инјекцијата се дава во мускулот на рамото. Спајк протеинот е многу веројатно дека нема да биде во концентрации ни оддалеку слични на тие што се создаваат во моделите од експериментите. Спајк протеинот од вакцината не се закачува за вирусната честичка, туку си постои како единечна протеинска молекула. И на тоа додадете го фактот дека модифицираната мРНК во вакцината не се задржува многу долго во телото и не генерира спајк протеин долго времепишува Горски.

Професорот Трент Мунро, кој бил вклучен во создавањето на кандидат за ковид вакцина од Универзитетот Квинсленд, за Асошиејтед Прес изјавил дека дозата од мРНК вакцината е многу мала и специјално дизајнирана за да осигура дека мала количина на спајк протеин е продуцирана од инјектирана РНК.

За време на развојот на вакцините, неколку количини на дозата беа тестирани, за да се пронајде дозата што е доволна да овозможи најдобар имун одговор и да заштити против ковид 19. Нема познати токсични ефекти од овој процес по вакцинација со мРНК вакцина, рекол тој.

Што се однесува на тврдењето изнесено во постот кое се однесува на пријавени смртни случаи по вакцинација, овие пријави не може да се толкуваат како да се причинско-последично поврзани со самата вакцина! Долго и опширно објаснување за тоа, „Вистиномер“ објави овде.

Оттука, тврдењата за опасноста на спајк протеинот, и неговата поврзаност со вакцината, ги оценуваме како невистинити, затоа што голем број медицински извори со консензус се согласуваат дека спајк протеинот по вакцината не е ист како тој на коронавирусот и е во многу мали количества, а телото го отстранува без последици откако ќе се создаде имун одговор.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.