Јордан Симонов од МНТ ја понесе наградата Ристо Шишков за најдобро актерско остварување

448

Наградата за највисоко актерско остварување на годинашното 31-то издание на Фестивалот на камерен театар „Ристо Шишков“ ја доби Јордан Симонов  од Македонскиот Народен Театар од Скопје за улогата на Павле во претставата „Лагата“ од Флоријан Зелер, во режија на Бесфорд Идризи. Наградата ја доби во конкуренција на 30 тина актери од 10 театарски престави од земјава и странство.  Според жирито, Симонов успеал со улогата да доминира на сцената и со својата актерска игра да оствари перфектна комуникација со публиката.

„Јордан Симонов, со внимателно избрани актерски средства, успева да оствари моќна и осмислена улога. Тој покажува особено чувство за партнерска игра и вешто го води ликот, кој во себе крие тајни, од привидна наивност до длабока перфидност. Со својата способност за трансформација, Јордан Симонов доминира на сцената, субверзивно поигрувајќи си со очекувањата на публиката, на работ меѓу комичното и неверојатното, меѓу лагата и вистината“, стои во одлуката на жирито.

Фото Сречко Гунчев

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.