Тивериополски филмски денови на „Астерфест“ во Струмица

131

Изминатиот викенд и денес во Струмица се одвиваат Тивериополските филмски денови на „Астерфест“, кои се своевидно загревање за овогодишното фестивалско издание на Интернационалниот филмски фестивал „Астерфест“, манифестација иницирана и востановена уште  во 2005 година. Најпрвин, на Светскиот ден на културното наследство, на ТВ каналот ВИС беше прикажана реставрирана верзија на комичниот култен филм „Скитникот“ на Чарли Чаплин, од 1915 година.  Покрај ова, во саботата вечер, во кафе-барот „Нагоре“ се случи неформален настан на кој се презентираше најновиот визуелен концепт на претстојното Астерфестово издание, кое е планирано под мотото „Кинореалност ‘24“.

Денеска, со почеток од 18 часот, во Europe House (Европскa куќа) во Струмица, ќе се одржи мини панел-дискусија насловена како „Авторството и филмот“. Воведни обраќања на темата ќе имаат д-р Горан Тренчовски, основачот и директор на „Астерфест“ и м-р Васил Михаил, актер и независен филмски творец. За таа пригода, ќе има проекција на три ексклузивни кратки филмови: „Пишта“ на Киро Урдин, „Четврток“ на Милчо Манчевски и „Деца“ на Наум Пановски.

Овие активности се реализираат со поддршка и во соработка со група независни филмски автори, Кинотека на РС Македонија и струмички субјекти и институции. Програмата за 19-тиот „Астерфест“ посветен на авторскиот филм, веќе е селектирана, во меѓувреме ќе има серија локални и меѓународни придружни активности, а централниот летен термин за компетитивните филмски настани, локациите, како и специјалните гостински лауреати, ќе бидат објавени наскоро, изјавија организаторите од здружението „Астерфест филм фестивал“.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.