Струмичките пожарникари се вратија од Турција каде изминатава недела беа во спасувачката мисија за пронаоѓање и спасување на преживеани лица од големиот земјотрес. Тие беа распоредени во градот Адијамен каде работеа заедно со 70 тимови од целиот свет. Водачот на тимот Вернер Стоилов вели дека се враќаат со помешани чувства, тажни од глетката и пустошот што го оставил земјотресот позади себе, но од друга страна и горди што успеале да помогнат во извлекување на живи луѓе.
„На петтиот ден добивме информација дека се слуша глас од некое затрупано лице. Веднаш стапивме во акција и по пет часа успеавме да извлечеме жива жена, која беше предадена на турските медицински служби,, вели Вернер Стоилов водачот на тимот на струмичките пожарникари кои беа дел од Републички сили за спасување
Пожарникарите ги пречека градоначалникот Костадин Костадинов. Порача дека е горд на нивната храброст и пожртвуваност, а во знак на благодарност од името на сите граѓани им додели и признанија.
,,Поклон до земја од мое име прво како човек, а потоа како градоначалник. Тие заминаа илјадници километри за да спасат човечки живот. Тие се гордост на Струмица и потврда дека нашиот град има луѓе кои се подготвени и специјализирани да одговарат на такви големи природни катастрофи,, изјави градоначалникот на Струмица Костадин Костадинов.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
