Во среда на 14 ти октомври на стадионот Благој Истатов во Струмица со почеток во 14 часот, младинскиот состав на АП Брера Струмица го игра реваншот со Санта Колома од Андора во УЕФА Младинската лига на шампиони. Во првиот меч струмичани беа фуриозни и славеа со 3:0 каде стрелци на головите беа Глигор Бучков и Филип Кулески. Во среда треба да го потврдат пласманот во следната фаза и да закажат двомеч со Хофенхајм од Германија.
Еве го кусото интервју со стратегот Ѓорѓе Стојчев
Дрнка.МК: Каква е атмосферата во тимот пред реваншот со Санта Колома?
Стојчев: Атмосферата е одлична. Првата победа во Европа беше посебен момент за овие момци и за целиот клуб, затоа што станува збор за историска прва победа на Брера и општо на македонски клуб во ова натпреварување. Но, веднаш после тој натпревар го свртивме фокусот кон реваншот. Овие момци покажуваат голем карактер. Покрај настапите во УЕФА Младинската лига на шампиони, тие играат и на уште два фронта во сениорскиот фудбал, што е големо искуство за нивниот иден развој.
Дрнка.МК: Дали 3:0 е доволно за следната рунда и двомеч со Хофенјахм ?
Стојчев: Имаме одлична предност, но не размислуваме дека работата е завршена. 3:0 е резултат кој ни дава самодоверба, но мора да одиграме уште еден сериозен натпревар.За нас ова е и историска шанса – да бидеме првиот тим кој ќе успее да помине во следната фаза во ова натпреварување и натпревар со Бундеслигашот Хофенјахм. Тоа е голема мотивација за сите нас.
Дрнка.МК: Ќе има ли измени во стартните 11 од оние во Андора ?
Стојчев: Можно е да има промени. Имаме голем број натпревари и мораме да водиме сметка за свежината и оптоварувањето на играчите. Но, без разлика кој ќе започне, очекувам максимална концентрација и одговорност.
Дрнка.МК: Што очекуваш во среда и зошто струмичани да дојдат на трибините ?
Стојчев: Очекувам тежок, но убав европски натпревар. Овие момци заслужуваат поддршка.Тие не се само младинци кои играат еден натпревар во неделата. Истовремено се натпреваруваат во Младинската лига на шампиони и на два фронта во сениорскиот фудбал. Тоа е огромно искуство и инвестиција во нивната иднина и иднината на мак фудбалот. Затоа ги повикувам струмичани и љубители на фудбалот од цела Македонија да дојдат во што поголем број. Имаме историска можност за клубот, за градот и државата – да ја потврдиме првата европска победа и да направиме уште еден историски чекор, односно пласман во следната фаза.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
