Струмица да добие кошаркарски второлигаш – врвот на КФСМ со владини советници на средба со градоначалникот Јаневски

439

Како да се врати сјајот на кошарката во Струмица во сениорска конкуренција. Ова било темата на средбата меѓу градоначалникот на Струмица Коста Јаневски со врвот на Кошаркарската Федерација предводена од претседателот Перо Антиќ и спортскиот директор Тодор Гечевски а на која присутни биле и советниците на премиерот Зоран Заев  за спорт и за млади Даниел Димевски и Ѓорги Тасев. Се разговарало за можноста Струмица да добие сениорски клуб кој ќе се натпреварува во Втора лига и каде ќе можат децата што излегуваат од кошаркарските школи од општината да ја продолжат својата кариера во сениорска конкуренција. Во тој проект – сениорски кошаркарски клуб  да учествува и општината но и КФСМ но и останатите институции заедно со струмичката бизнис заедница било заклучено на средбата.

,,Разговаравме за идејата и можноста да се формира кошаркарски второлигаш кој ќе се натпреварува во сениорска конкуренција. Идејата ја поздравија и од Федерацијата и допрва заеднички ќе работиме на тој сегмент. На маса отворивме повеќе опции како да се најде вистинското решение, бидејки наша примарна цел е да го вратиме сјајот на струмичката кошарка и создавање на нови кошаркарски имиња. Ние како општина постојано сме ја помагале кошарката кога била во сениорска конкуренција. Ја потврдив мојата заложба за континуирана поддршка, но и потенцирав дека треба сите заедно да соработуваме и да го дадеме максимумот за развој на спортот и кошарката во нашата општина’’, ни изјави градоначалникот на Струмица Коста Јаневски

Општина Струмица последната првенствена сезона немаше свој преставник во сениорска конкуренција иако  требаше да се натпреварува во Втора лига преку КК Струмица кој се регистрираше како  АД и е во сопственост на општината. Интенцијата на Кошаркарската федерација е Струмица да го реактивра клубот во сениорска конкуренција бидејки е град со кошаркарски потенцијал а своевремено беше и кошаркарски шампион.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.