Позитивната атмосфера во клубот ми дава верба за успех и враќање во Прва лига, вели новиот тренер на Беласица Ване Милков

842

Деновиве ФК Беласица го промовираше новиот шеф на стручен штаб. Синобелите идната сезона во второлигашкото друштво ќе ги предводи Ване Милков – млад надежен тренер кој со подмладокот на Беласица има добри резултати. Кои се амбциите, што може да очекуваме од следната сезона, како ќе течат подготовките, има ли шанси да се вратат во Прва лига….

Дрнка.МК: Што значи за тебе именувањето на прв тренер на Беласица

Милков: Ако би требало да опишам со збор – два, би рекол: одговорност и предизвик. Знаејќи ја тежината на оваа функција, воопшто не беше лесно да се одлучам на ваков чекор и да го прифатам овој за мене огромен предизвик. Името „Беласица“ само по себе носи голема тежина. Одговорноста и задачите се секогаш големи, амбициите исто така. Сепак за мене е огромна чест и привилегија што сум тренер на една одлична екипа, со доста квалитетни и талентирани фудбалери и тоа ме прави посебно горд.

Долго време сум во ФК Беласица,  условите за работа се одлични, работната атмосфера исто така. Колегите кои ги имам до мене во стручниот штаб се големи професионалци и поддршката која ја добив од нив во изминатиот период беше и главната причина за да го прифатам тој предизик.

Имаме одлична меѓусебна комуникација, одлична соработка, а тоа се главните предуслови за позитивни резултати.

Дрнка.МК: Може ли Беласица да ја вратиш во Прва лига ?

Милков: Доколку експресно се вратиме во Прва лига, целата заслуга ќе им ја препишам на моите фудбалери.Тоа го велам затоа што во моментот го имаме најмладиот состав во првенствотото, а за тоа говори и самиот факт што во екипата имаме дури 11 фудбалери кои се помлади од 19 години.

Наша цел сезонава е да ги промовираме нашите млади и перспективни фудбалери, а фаворитската улога им ја препуштам на останатите поискусни екипи.

Нека после оваа сезона во овие талентирани фудбалери Беласица добие неколку клучни првотимци, кои во иднина ќе бидат јадрото на тимот. Па ние и нашите симпатизери да бидеме горди на нив

Дрнка.МК Кои се новите засилувања и каква е програмата на пдоготовки

Милков: Нови засилувања во тимот се Цветан Чурлинов, Даниел Радојчиќ, Дарко Размоски, Игор Паноски, Никола Спасов и Зоран Ивановски. Вчера истите имаа презентација на клупскиот веб сајт. Но морам да истакнам дека поголемиот дел од костурот на екипата од изминатите сезони останаа. И во моментот надополнети и засилени со овие 6 нови фудбалери можам да кажам дека имаме одличен, подмладен и доста квалитетен состав.  И тоа ме прави посебно среќен.

Енергијата, желбата за надигрување и позитивната атмосфера во тимот која е присутна на тренинзите ми дава огромна верба во моите момци и мотивација плус за успешни резултати во тековната сезона.

Во понеделник заминуваме во СЦ Истатов – Нов Дојран каде ќе обработиме дел од подготовките а ќе одиграме и два контролни натпревари. Откако ќе се вратиме, ни следуваат уште неколку контролни натпревари и тоа со: ФК Кит-Го, ФК Кожуф, ФК Тиквеш, ФК Пелистер, ФК Работнички.

Преку овие натпревари ќе ја дозираме формата, ќе ги увидиме грешките и недостатоците кои се составен дел од играта, и чекор по чекор ќе ги решаваме проблемите за време на контролните натпревари но и за време на тренажниот процес.

Се на се, пред нас е еден многу напорен период, но  заедно со мојот стручен штаб ќе дадеме се од себе за да ја оправдаме довербата доделена од управата на клубот.

А зошто да не ги израдуваме и нашите навивачи и симпатизери со повторно враќање во елитата.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.