До септември треба да стасат првите електрични автобуси во Струмица – објавен договорот за набавка вреден 7 милиони евра

2437

Во рок од шест месеци или најдоцна до септмеври, во Струмица треба да се достават пет електрични автобуси кои ќе бидат од марката  ISUZU NOVOCITI VOLT произведени лани или годинава. Станува збор за автобуси кои ќе бидат долги околу осум а широки околу два и пол метри. Другите пет електрични автобусти треба да се достават за година и половина или во рок од 18 месеци од потпишувањето на договорот. Во техничката спецификација во која Дрнка.МК направи увид, автобусите во Струмица треба да се движат на батерии со капацитет  268 (кWh) и треба да бидат со капацитет за 47 патници, 25 ќе бидат на седишата од кои 4 ќе се склопливи плус за возачот.

Ова се деталите од договорот што Јавното сообраќајно претпријатие „ Струмица транспорт“ од Струмица го склучи со „Аутомакедонија“ АД Скопје за набавка на десет електрични автобуси со финансиски лизинг за што е ангажирана „Шпаркасе лизинг“ ДОО Скопје како давател на финасискиот лизинг. Станува збор за фирма која есента во 2022 година обезбеди тест возење со електричен автобус во Струмица. Вредноста на договорот што го потпишаа во првата декада месецов изнесува околу 430 милиони денари или околу 7 милиони евра.

Според склучениот договор, ЈСП „Струмица транспорт“ треба да плати 10 % учество од вкупната вредност на договорот по испорака на автобусите и добиената фактура. Плаќањето на останатиот износ ќе се врши по пат на финансиски лизинг за период од 84 месеци на еднакви месечни рати во кои ќе бидат вклучени каматите, главниот долг и сите останати трошоци. Струмица транспорт се обврзува за целотот времетраење на договорот за лизинг на давателот на лизинг да му ги плаќа износите на месечните рати до 22-ри за секој месец.

Откако ќе се исплати последната рата од финазискиот лизинг возилата остануват во сопственост ЈСП Струмица транспорт Струмица.

Со овие автобуси како што е веќе познато, ќе се реализира јавниот градски превоз во Струмица при што ќе бидат опфатени и населените места. Според планот, предвидено е со превозот да бидат опфатени и учениците со што Општина Струмица нема да  ангажира други економски оператори за реализација на превозот на учениците до училиштата. Автобусите меѓудругото ќе се исплаќаат од блок дотациите за превоз на ученици.

„Целиот концепт е што ратата за лизингот со каматите би се покривале од блок  дотациите кои ги добиваме од Министерството за образование за превоз на ученици. 148 милиони денари издвојува Министерството годишно за превоз на  ученици  во Струмица и тоа ни дава за право да воведеме јавен превоз и тоа еколошки. Секако дека нема да го преземеме превозот на сите ученици, туку само за децата од населените места од  Општина Струмица“ кажа градоначалникот Костадин Костадинов  при носењето а  одлуката за јавен градски превоз со електрични автобуси.

Првиот човек на Струмица кажа дека за пензионерите градскиот рпевоз ќе биде бесплатен а цената на чинење за една релација возење би изнесувала околу половина евро. Воведувањето јавен градски превоз со електрични автобуси би требало да придонесе и кон намалување на аерозагаденоста во Струмица.  (В.Трајков)

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.