Не смееме да дозволиме храмот Св. Кирил и Методиј во Струмица да се распаѓа, почна кампања за собирање донации за реконструкција

911

Струмичката Православна Епархија започна со кампања за собирање донации за реконструкција на храмот на Светите Кирил и Методиј во Струмица. Во објавата, велат дека, после неколкуте неуспешни обиди да добијат финансиски средства од министерството за култура, под чија заштита е објектот, немале простор освен да побараат помош од верниците, заедно да го заштитат храмот кој е заедничка радост на сите.

– Вековниот храм Божји кој повеќе од 100 години бил и е наша утеха, надеж, прегратка, закрила во премреженијата,  денес се распаѓа пред наши очи. Не смееме да дозволиме незаинтересираноста и негрижата на државните институции да му пресудат на храмот кој ги надминува и времето и просторот. Не смееме да дозволиме влагата, мувлата и кровот да го нагрдуваат убавото лице на на нашата светиња, која се одликува со специфична архитектонска посебност и уникатност и кој е еден од белезите на Струмица, се вели во писмената информација од Струмичката Православна Епархија.

Оттаму додаваат дека министерството не одобрило средства ниту за изработка на проект, па сегашниот го добиле како дар од градежната компнаија ЖИКОЛ која што заедно со стручните лица од НУ Завод и Музеј Струмица ја подготвија целокупната документација за реализација на овој голем реконструктивно градежен потфат.

– Нашата љубов кон храмот на Светите Кирил и Методиј ќе ги надмине сите ограничувања, по зборовите на светиот апостол Павле: „И како што изобилувате во сè, во верата, во словото, во знаењето, во секаква ревност и во љубовта кон нас, покажете го своето изобилство и во ова дело на љубовта.“ Сите добронамерни граѓани, компании, фирми кои што сакаат да учествуваат може да донираат на жиро сметка: 300030000110760, Комерцијална Банка АД Скопје, Цел на дознака: Донација за храмот на Св. Кирил и Методиј“, стои во информацијата.

Истовремено за секаков друг вид на информација стои на располагање управата во храмот на Свети Кирил и Методиј во Струмица.

Храмот е составен од два дела, горна и долна црква. Долната крипта е посветена на Светите Петнаесет Тивериополски Свештеномаченици е изграден во 1750 година и се наоѓа под нивото на земјата, додека горната е црквата на Светите Кирил и Методиј изградена во 1911 година.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.