Нема заболувања кај рибите во Дојранското Езеро опасни по здравјето на граѓаните, соопшти АХВ

957

Агенцијата за храна и ветеринарство информираше дека со досегашните контроли не е утврдено присуство на заболувања кај рибите во Дојранското езеро кои се опасни по здравјето на граѓаните. Паразитите пронајдени кај одделни риби не се штетни и се уништуваат со термичка обработка на месото, соопштија од ова институција откако деновиве на социјалните мрежи се појавија видеа дека во карашот, плашката и кострешот имало штетни паразити кои биле опасни по човековото здравје.

,,Паразитот за кој се шират дезинформации на социјалните мрежи не е од видот аниссакис кој го има во морските риби и кој е штетен за човековото здравје ако рибата се консумира сурова, односно без термичка обработка, што е случај во некои земји. Во услови на зголемена побарувачка и потрошувачка на риба, како одговорна институција за безбедноста на храната, до граѓаните упатуваме апел да купуваат риба исклучиво од објекти кои се регистрирани и одобрени од страна на АХВ и кои ги исполнуваат условите за хигиена дефинирани со Законот за безбедност на храната и прописите кои произлегуваат од него,, велат од Агенцијата за храна и ветеринарство .

Реагираше и градоначалникот на Дојран Анго Ангов кој апелираше до граѓаните да не објавуваат непроверени и неточни вести кои може да му наштетат на туризмот и угостителството во Дојран. Според него секој месец се вршат контроли што е законска обврска на концесионерот и досега не биле констатирани било какви заболувања на рибниот фонд.

Старите рибари и угостители од Дојран тврдат дека паразитите пронајдени во дел од рибите објавени во видеата на социјалните мрежи се резултат на навремено неисчистени и лошо складирани риби. Станува збор за паразити кои со термичка обработка се уништуваат и заради неинфомрираност кај одделни граѓани, несакајки се прават штети на ова место кое препознатливо по специјалитети од риба.

По реакции на јавноста пред се дојранчани, видеата се повлечени од социјалните мрежи

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.