На 72 години струмичанецот Јосе Црнгаров им пркоси и на годините и на височините, секојдневно чисти оџаци !

3177
( Јосе Црнгаров повеќе од 30 години се занимава со овој занает за кој вели дека од младите нема интерес и апелира домакинствата да користат суви огревни дрва )

Со стартот на грејната сезона 72 годишнниот Јосе Црнгаров од Струмица речиси да нема слободен ден. Со својот велосипед и потребната опрема за чистење оџаци постојано е ангажиран од сопственици на куќи, како и од станари од стамбени згради. Тој е еден од ретките во струмичко кој се занимава со овој занает кој го научил како парноложач во некогашна Треска. Сам ги чисти оџаците без асистенти или помошници, бидејки ретко кој од младите сака да се занимава со оваа работа. Дневно работи на два до три куки или згради и чисти најмалку по 6 до 8 оџаци. Се качува на објекти високи и до 30 метри и вели дека кога е на високо е далеку повнимателен и некако побезбеден.

,, Опасно како не е опасно. Но мене височините не ме плашат. Се качувам на покриви од куќи и згради високи и до 30 метри. Мора да се биде претпазлив не само за сопствената безбедност туку и да не испокршиш керамиди или поткровна конструкција на објектот, бидејки кровови стари и над половина век. Ме води љубовта кон оџачарството бидејки ова е хумана работа. Свесен си дека со чистење на оџаците даваш придонес да не дојде до пожар во самиот објект. Затоа секогаш апелирам домакинствата редовно да ги чистат,, вели Црнгаров.

Со себе понесува метални четки , сајли и друга опрема. Ако домакинството нема,  понесува и скала за да може да се качи од внатрешниот дел  на покривот од објектот. За чистење на еден оџак потребни му се околу 20 тина минути. Доколку е запушен со одреден отпад најчесто од птичји гнезда постапката е подолга. Црнгаров вели дека оџачари во Струмица има се помалкуи тоа во поодминати години. Никој од помладите не сака да се занимава со овој занает на кого гледаат како со потценување.

,, Ги молам првенствено тие што не се плашаат од височини оти овој занает најдобро се учи со некој поискусен. Може да се заработи солидна дневница. Но младите струмичани преферираат да седат по кафичи и по паркови отколку да учат занает, посебно овој. Прво што прашуваат колку ќе ме платиш отколку да се заинтересираат како оди постапката. Треба да има таков кадар оти свесни сме преку зимата што се случува. Пожарниакрите честопати интервенираат на запалени оџаци,, објаснува 72 годишниот Црнгаров

Според него оџаците на објектите треба да се чистат двапати годишно. Пред отпочнување и веднаш по завршување на грејанта сезона. На тој начин се отстрануваат сите „саги“ што се лепат по излезните канали а се лесно запаливи при високи температури. Црнгаров упатува и апел до сите домакинства да не користат штотуку набрани огревни дрвја туку огревно дрво кое е добро исушено и стоело најмалку една година

,, Домакинствата сега ги набавуваат и веднаш ги користат. Влажните дрвја прават поголема опасност отколку сувите. Затоа апелирам сите што се греат на огревни дрва, да користат даб или бука но да бидат набрани пред година дена. На тој начин нема да дојде до „запушување“ на оџаците. Паралелно забранувам домакинства да користат и отпад од дрвна маса,, апелира Црнгаров кој за чистење оџак од куќа наплаќа по 500 денари додека за оџак од стамбена зграда по 200 денари од домакинствата чии грејни тела се приклучени на тој канал.

Неисчистените оџаци се најчеста причина за појава на пожари во стамбени објекти преку зимскиот период велат од струмичката противпожарна единица. И од таму апелираат да се искористи доброто време и сите кои се греат на овој енергенс да направат проверка и да ги исчистат сите канали на грејни тела. (В.Т)

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.