Панов доби стипендија за да игра во НЦАА лигата во САД – ,,Сонот полека ми се исполнува, НБА е целта’’ вели струмичанецот !

1123

Струмичкиот кошаркарски интернационалец Кирил Панов останува уште четири години во САД откако доби стипендија од приватниот ,,Mississippi College’’ за да биде дел од нивниот кошаркарски тим за да настапува во универзитетската НЦАА лига. Стипендијата е резултат на одличните игри на Панов во дресот на ,,Kennedy Elite Basketball Academy’’ каде имаше фантастичен учинок од 14.4 поени, 5.6 скока и 6 асистенции по натпревар. Младиот Панов за Дрнка.МК вели дека тоа е нов предизвик за него и исчекор во исполнување на неговите соништа.

,,Се работи за Mississippi College од градот Jackson во сојузната држава Мисисипи, важи за еден од најдобрите приватни универзитети во државата и истиот датира од 1826 година. Очекував стипендија со оглед на моите одлични кошаркарски изданија во Kennedy Elite Basketball Academy оваа година во Синсинати и премногу сум среќен што ќе бидам дел од една одлична екипа но и академски одличен универзитет. Ова за мене претставува вистинска награда за сработеното во последниот период на спортско но и академско поле, но и голем предизвик кој што ќе ми помогне уште повеќе да се трудам и да се борам за многу повисоки постигнувања’’, ни изјави Панов

НЦАА е најдобрата лига во Колеџ кошарката во САД и Мисисипи важи за еден успешен проект кој што со долги години традиционално настапува на плеј офф турнирите и секогаш со одлични резултати. Првиот тренер на екипата е Мајк Џонс кој што е на истата позиција веќе 37 години и е тренер со многу успеси зад себе и одлично знае да направи добра екипа која ќе биде фаворит за следната година.

,, Може да очекуваме вистинска борба во следната сезона. Кошаркарската екипа на Мисисипи Колеџот има одличен состав, а јас може да ветам дека Кирил Панов полн енергија кој ќе реди успеси и успешни партии во жолто-плавиот дрес и се надеваме на успешна кариера во годините кои претстојат во САД или пак во некоја од силните европски лиги. Сонот полека ми се исполнува, јас силно верувам во себе и знам дека ќе претстојат блескави моменти. НБА е целта, секојдневно работам макотрпно на таа цел а само времето ќе покаже до каде сум способен да одам. Се надевам на многу успеси во следната моја етапа, а за неколку години да се надеваме и на НБА,, ни изјави Панов кој од март е во родната Струмица паради глобалната пандемија со коронавирусот.

Како што вели, во САД планира да се врати во август но се зависи од новонастанатата ситуација со глобалната пандемија, но се надеваме дека се ќе се врати во најбрз можен рок.

Како што е познато Кирил Панов на 14 годишна возраст замина од КК ,,Ролинг’’ од Струмица во кошаркарска Шпанија каде беше речиси пет години. Таму играше за Тералфас и Естудиантес. Паралелно тој е еден и од носителите на играта на македонската младинска кошаркарска репрезентација и сериозно чука на вратата на сениорската кошаркарска селекција.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.