Како да се зачуваат и оплодуваат парите, каде ќе инвестира Wall Street во 2027 година и како да се препознаат финансиските измами – ова се дел од темите за кои во сабота, 21 ноември, во хотелот „Цар Самуил“ во Струмица ќе говори Владимир Ѓукановиќ, познат како „Филозофот од Wall Street“.
Станува збор за финансиски експерт со долгогодишно искуство на Волстрит и во Лондон, кој управувал со милијарди долари и денес своето знаење го пренесува на луѓето од Балканот, објаснувајќи им како паметно да управуваат со личните и деловните финансии.
Настанот е насловен „Тајните на инвестирање 2.0“, а го организираат Be#Next Events и NextGen Podcast. Целта е на едно место да се отворат прашања кои се важни не само за инвеститорите и бизнисмените, туку и за секој граѓанин кој има заштеда или сака подобро да располага со своите пари.
Владимир Ѓукановиќ има богата меѓународна кариера. Студирал филозофија и економија на DePauw University во САД, а професионалниот пат го започнал во JP Morgan Asset Management во Њујорк, каде што работел девет години и стигнал до раководна позиција во одделот за деривати на акции и портфолио тргување.
Потоа бил главен трејдер во John Levin & Co. Europe, инвестициски фонд со над 11 милијарди долари, а од 2006 до 2010 година бил партнер и главен трејдер во Cirsio Capital во Лондон. Денес е автор на книгата „Тајни инвестирања“ и романот „Блистање“, учествува на универзитетски предавања и конференции и советува балкански компании кои сакаат да настапат на меѓународниот пазар.
Настанот во Струмица започнува во 17:30 часот со регистрација, welcome drink и можност за запознавање и деловно поврзување. Во 18 часот е официјалното отворање, по што Огнен Огненоски од Target Group ќе одржи презентација на тема „Бизнис мрежа“.
Главното предавање на Владимир Ѓукановиќ е закажано за 19 часот, а по него ќе следуваат прашања и одговори, доделување награди и networking коктел.
Предавањето ќе биде на српски јазик, разбирлив за македонската публика.
Билетите во последниот продажен рок чинат 3.999 денари. За резервации и дополнителни информации заинтересираните можат да се обратат на 072 302 649, преку електронската пошта info@benext.mk или на веб-страницата konferencija.benext.mk.
























