Истекува рокот за исплата на К 15 – вработените со минимум 6 месеци стаж мора да добијат !

8054

Работодавачите имаат уште петнаесеттина дена за исплата на регресот за годишен одмор. Законскиот рок истекува заедно со последниот ден од годинава. Ова е право на секој вработен кој зад себе има минимум шест месеци непрекинат стаж. Неважно дали на определено или неопределено време.

Иако Законот е дециден, дека никој ни од јавниот ни од приватниот сектор не е ослободен од оваа давачка, досегашната практика покажува низа обиди да се забошоти обврската кон вработените. Во текот на минатата година, на пример, до ССМ стигнале повеќе од три илјади поплаки за воопшто неисплатен или фиктивно исплатен К-1. Односно, многумина се сочиле со барањата – парите легнати на сметките, во кеш да му се вратат на работодавачот.

Оваа појава е присутна и покрај предвидените казни, кои се движат до четири илјади евра. Од кои до две до три илјади евра за фирмата и од 500 до илјада евра за одговорното лице. За оние, пак, кои симулираат исплата, Законот предвидува затворска казна од три месеци до една година.

Оттаму, сите кои ќе наидат на овој проблем, треба да се обратат до Државниот инспекторат за труд, кој го контролира процесот на исплатата – по пристигната пријава или самоиницијативно. Исто така, своите права вработените можат да ги заштитат и преку судска постапка.

Инаку, минималниот износ за К-15 е околу 14.000 денари, што претставува 40 проценти од просечната плата во последното тромесечје. Максимумот, пак, е колку и просечната плата, која според септемвриската статистика е на нивото од 37.876 денари.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.