Заради немање кадар, новиот крак на Струмичката болница сеуште не е ставен во функција за ковид пациенти

252

Нема конкретна информација кога ќе биде ставен во функција првиот кат од новото болничко крило на Струмичката болница за третман и лекување на ковид пациенти иако министерот за здравство Венко Филипче пред половина месец најави дека тоа ќе се случи за некој ден. Станува збор за цел спрат со 100 легла, опремен со централен довод на кислородна поддршка каде се планира да се хоспитализираат пациенти со потешка клиничка слика за да се ублажи притисокот на инфективното одделение и дневните ковид амбуаланти. Директорот на болницата Наќе Гогов вели дека и да биде ставен во функција нема кој да работи на новиот ковид болнички спрат, бидејки кубурат со персонал. Им фалаат како лекари специјалисти така и  медицински сестри.

,,Немаме персонал. Имаме вкупно 12 лекари и медицински сестри позитивни на ковид-19 или ставени во домашна изолација. Со сегашниот кадар не успеваме да ги покриеме сите одделенија. Доаѓаат двајца специјалисти од Скопје но за да се отвори тој спрат ни треба кадар а ние во моментов го немаме. Поднесовме барање за ангажирање сестри на договор на дело, но немаме добиено одговор. Таму треба медицински персонал  кој ќе се грижи за хоспитализираните пациенти’’, ни изјави Гогов кој подвлече дека идната недела очекува да стаса амбуалантното возило од Бугарија што го најави семејството Заеви како донација.

Во Струмичката болница во моментов се лекуваат 100 тина пациенти од кои дури 40 тина на инфективното одделение. Според Гогов десетина од нив се на кислородна поддршка а во текот на вчерашниот ден починале уште две лица. Останатите лица кај кого е дијагностициран вирусот се на третман во ковид амбулантите бидејки имат полесна клиничка слика. Таму дневно се лекуваат околу 60 пациенти за што се ангажираат сестри од другите болнички одделенија.

Последните денови во овој регион се регистрираат по 30 тина нови позитивни со коронавирус. Од почетокот на пандемијата досега во струмичко според Институтот за јавно здравје   регистрирани се 1 146 пациенти со коронавирус, 33 лица починале од компликации од вирусот а оздравени се 499 лица. Во моментов во Струмица и остантите три општини од овој регион има 614 активни случаи со ковид-19.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.