Тенденциозно се обвинува Украина дека сака да предизвика трета светска војна

360

Во постот што го рецензираме односно во насловот на текстот што е споделен, а кој се повикува на агенцијата Ројтерс, се пропушта контекстот кога се вели дека „Украина на секој начин се обидува да почне трета светска војна“. Во оригиналниот напис на Ројтерс каде е пренесена изјавата на секретарот на Советот за национална безбедност и одбрана на Украина, Алексеј Данилов, нема детали за тоа на што мисли Данилов кога вели „руска трага“. Во текстот на Ројтерс, покрај тоа што е наведено дека изјавата е дадена без дополнителни детали, никаде не се тврди дека Украина сака да предизвика трета светска војна, туку дека Алексеј Данилов изјавил дека Украина сака заедничка студија на инцидентот од вторникот (15.11.2022) со своите партнери и да ги види информациите кои се основа за заклучоците на нејзините сојузници

 

Рецензираме пост објавен на социјалната мрежа Фејсбук во кој се тврди:

Украина се обидува на секој начин да предизвика трета светска војна, тврдат дека имаат докази за „руска трага“ во експлозијата во Полска.

Во самиот пост е линкуван текст во којшто се вели:

Секретарот на Советот за национална безбедност и одбрана на Украина Алексеј Данилов денеска изјави дека Киев има докази за „руска трага“ во експлозијата во источна Полска, за која Варшава и НАТО велат дека најверојатно била предизвикана од украинска ракета за противвоздушна одбрана.

Данилов не соопшти детали во врска со тоа тврдење, објави Ројтерс.

Во постот се пропушта контекстот, бидејќи се тврди дека  „Украина се обидува на секој начин да предизвика Трета светска војна“. Во оригиналниот напис на Ројтерс, каде е пренесена изјавата на Данилов, нема детали за тоа на што мисли Данилов кога вели „руска трага“. Во текстот на Ројтерс, покрај тоа што е наведено дека изјавата е дадена без дополнителни детали, никаде не се тврди дека Украина сака да предизвика трета светска војна, туку дека Алексеј Данилов изјавил оти Украина сака заедничка студија на инцидентот од вторникот (15.11.2022) со своите партнери и да ги види информациите кои се основа за заклучоците на нејзините сојузници.

Киев е целосно отворен за разбирливо проучување на ситуацијатанапишал тој на официјалната Фејсбук страница на Советот.

Претседателот на Полска, Анджеј Дуда на прес-конференција прашан за коментарот на Данилов, изјави:

Истражувањето се спроведува со помош на полски и американски експерти и ако некој сака да биде вклучен во него, тогаш треба да има согласност од двете страни.

Во моментот на објавата на текстот, во којшто небазирано на факти, туку на сопствена шпекулација, се тврди дека Украина сака да предизвика трета светска војна, евидентно е дека има истрага за експлозијата во Полска и нема никакви дефинитивни заклучоци од таа истрага. Барањето на Украина да учествува во таа истрага не е предизвикување на трета светска војна и таквата оценка и коментар во насловот на текстот се небазирани на докази.

Во врска со проектилот којшто падна во село во Полска во вторникот вечерта (15.11.2022) и каде загинаа две лица, претседателот на Украина, Володимир Зеленски нема сомнеж дека Украина не е виновна. Иницијалната оценка на НАТО е дека експлозијата се случила во моменти кога Украина се обидувала да се брани од Русија. Зеленски изјави дека негови високи воени командири го уверувале дека не станува збор за украински проектил, ниту проектилен истрел, како причина за инцидентот.

Полското Министерство за надворешни работи, пак, соопшти дека ракета од руско производство паднала врз селото Пржеводов, во источна Полска, на околу шест километри од границата со Украина по што загинаа две лица. Русија негираше дека нејзините ракети ја погодиле полската територија, велејќи дека извештаите биле „намерна провокација“ за ескалација на ситуацијата.

Набрзо по  експлозијата на проектилот на територијата на Полска американскиот претседател, Џо Бајден изјави дека :

Малку е веројатно во линиите на траекторијата проектилот да е истрелан од Русија, но ќе видиме.

Новинската агенција Асошиејтед прес цитира тројца американски официјални лица, кои велат дека првичните сознанија сугерираат оти проектилот што ја погоди Полска бил истрелан од украинските сили, кои се обиделе да пресретнат руска ракета.

Американската реакција доби ретка пофалба од Русија, при што портпаролот на Кремљ, Дмитриј Песков,  ја опиша како „воздржана и професионална“.

Вреди да се забележи воздржаната и многу попрофесионална реакција на американската страна и американскиот претседателрече Песков, пренесе Би-би-си.

Генералниот секретар на НАТО, Јенс Столтенберг, потврди дека експлозијата во Полска, која уби двајца цивили, не се резултат на намерен напад. Според него, нема инцикации дека Русија подготвува офанзивни воени дејствија против НАТО.

Нашата прелиминарна анализа сугерира дека инцидентот најверојатно беше предизвикан од проектил на украинската против-воздушна одбрана, истрелан во одбрана на украинската територија против нападите со руски крстосувачки проектили. Но, дозволете ми да бидам јасен. За ова не е виновна Украина. Крајната одговорност е кај Русија, додека продолжува со својата незаконска војна против Украина – изјави Столтенберг.

Поради сите горенаведени факти, оценуваме дека во постот што го рецензираме, односно со насловот каде се вели дека Украина на секој начин се обидува да почне трета светска војна, се пропушта контекстот.


Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.