Општина Ново Село го објави повикот за продажба на парцели за изградба на викендици во атарите на селата Смоларе и Мокрино. Станува збор за вкупно 13 парцели од кои 10 се во атарот на Смоларе додека остантите три се кај Мокрино. Паралелно има повик и за продажба на две парцели во Борисово и Ново Село за изградба на стамбени објекти за домување.
Согласно објавата која ја има на општинската веб страна на Ново Село парцелите се со површина од 160 квадратни метри од кои 80 квадрати треба да биде површината на градба. Почетната цена по метар квадратен изнесува 61 денар.
Заинтересираните физички и правни лица може да се пријават до 17 август до 15 часот и 30 минути, додека два дена подоцна конкретно на 19 август е закажано јавното наддавање за сите парцели одделно, во одредени сатници.
Продажбата на парцели за викендици градоначалникот на Ново Село Ѓорѓе Божинов ја најави уште на почетокот на јуни. Тогаш подвлече дека општината работи на постапка за нова викенд населба во атарот на Смоларе во непосредна близина на Смоларскиот водопад со цел да се зголемат сместувачките капацитети во интерес на развој на руралниот туризам во подбеласичкиот регион. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
