Нема да дозволиме нашата татковина да се претвори во рударско решето и рударска колонија. Вака реагираат еколошките здруженија од Југоистокот откако во Службен весник излезе Одлука на Владата за започнување постапка за доделување на концесија за вршење на проспекциски геолошки истражувања на металични минерални суровитни во 27 општини во источна Македонија. Со ова одлука потпишана од вицепремиерот Љупчо Димовски се дава можност во наредниот период заинтересирани фирми да вршат истражувања за откривање на нови наоѓалишта со металични минерални суровини во општините од Куманово до Гевгелија.
За екоактивистите од „Здрава котлина“ ваквата одлука значи создавање простор за отворање рудници во Југоистокот иако со години се бораат против било каков рудник во овој дел од државата. Сметаат дека време е за масовен отпор и граѓанска мобилизација и тоа на долг рок.
„Додека обичниот народ се бори за пристоен живот, чист воздух и за заштита на сопствениот имот, луѓето во фотелјите со еден потпис решаваат да ја претворат нашата татковина во рударско решето. Ова не е битка меѓу политички партии, ниту е обична еколошка интервенција. Ова е генерациска, биолошка борба за опстанок на нашите семејства, на нашите домови и на плодната македонска земја. Борбата што е пред нас не е спринт, туку маратон на издржливост. Власта се надева дека народот ќе се умори, дека еколошките здруженија ќе се исцрпат и дека револтот ќе згасне. Затоа, нашиот одговор мора да биде паметен, долгорочен “ стои во реакцијата на Здрава котлина
На ист став се и младите од движењето „Ја штитам Беласица“. Давид Златанов тврди дека ваквата одлука на Владата е директен удар врз иднината на Југоистокот бидејки граѓаните веќе се изјаснија дека не сакаат рудници а некој работи спротивно на нивната волја.
,, Нема да дозволиме Истокот и Југоистокот повторно да станат полигно за интересите на рударските компании. Ќе ја кренеме целата јавност на нозе и ќе побараме секој функционре јавно да се изјасни по ова прашање а не да се кријат зад молкот. Секој што ќе застане на страната на ваквите проект ќе мора да им објасни на граѓаните зошти ги става во ризик нивното здравје, вода и земја“, смета Златанов
Киро Шопов од граѓанската „Еко долина“ од Ново Село е шокиран од последната одлука на Владата да с еотпочне постапка за геолошки истражувања во Источна Македонија. Како што вели најмногу го загрижува индеферентниот однос на локалните политичари по оваа прашање.
„Зачудени сме од оваа одлука. Ние очекуваме да се поништат веќе издадените концесии за рудници а Владата дава можност за нови. Јавно нека излезат градоначалниците, советници и пратениците и го кажат својот став бидејки сите општини донесоа одлука дека се против отворање рудници на овие територии, оти народот не сака. Ако народот не сака тогаш зошто упорно се отвора оваа прашање“, вели Киро Шопов од „Еко долина“ од Ново Село
Затечени од новата одлука на Владата се и од граѓанското движење „Changemakers4all“ од Гевгелија. Ги повикаа сите фунцкионери и народни избраници јавно да кажат дека се против ваквата одлука и против рудници оти одлука за проспекција значи утре и одлука за експлоатација и загадена животна средина.
„Лажат дека станува збор „само за истражување“. Секој рудник почнува токму така. Денес проспекција, утре експлоатација. Затоа ги повикуваме сите народни избраници независно дали се градоначалници, советници или пратеници јавно да кажат не на ваквата одлука. Народот веќе се изјасни дека не сака рудници и дека со години се бориме против оваа зло и не гледаме причина. Будни ќе бидеме и ќе дејствуваме оти наше право е да знаеме што се подготвува зад нашиот грб“, ни изјави Марина Томова еко активист од Гевгелија
Пред десетина дена еколошките здруженија од Југоистокот со поддршка од колеги од Скопје и Прилеп побараа Владата да ги поништи концесиите за рудникот Иловица Штука на планината Огражден оти овој рудник освен Струмичката котлина ја загрозува и цела држава. Во спротивно најавија сеопшт, сееколошки и сеграѓански отпор против рудниците на смртта. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
