Ангова ја промовираше „Гатанки за сѐ и сешто и за уште нешто” во Гевгелија, книга наменета за секое дете

915

Илустрираната книга за деца „Гатанки за сѐ и сешто и за уште нешто” од младата авторка Магде Ангова беше промовирана во Гевгелија. Станува збор за дело кое е во издание на „Либи”, дел од „Арс Ламина – публикации”, збогатена со илустрации од Елена Давчева-Стојановска, а  уредувана од Оливера Ќорвезироска.

,,Книгата на забавен и интересен начин го отсликува светот околу нас. Многу предмети, животни, растенија и личности кои нѐ опкружуваат и се среќаваме со нив во секојдневниот живот се прикажани, опеани со необична и игрива рима. Со „Гатанки за сѐ и сешто и за уште нешто” децата ќе се забавуваат, ќе научат многу интересни работи за светот што ги опкружува, а родителите, читајќи им ја книгата, ќе поминат квалитетно време со своите најмили,, стои во информацијата за книгата првенче на Ангова која живее во Гевгелија а работи во општина Дојран

Изданието првично беше промовирано минатиот месец во „Литература.мк суперстор” во „Скопје сити мол”, а на неодамна одржаниот Саем на книгата 2022 авторката потпишуваше книги на штандот на „Арс Ламина”.

„Гатанки за сѐ и сешто и за уште нешто” е игрива, тематска збирка што ги оживува и ги осовременува гатанките како специфичен жанр, омилен и популарен за децата од ниските одделенија. Со досетлив, лирски избор на заглавните зборови – решенија на гатанките, и со опуштен, врзан стих со рима, Магде Ангова создала интересен поетски свет за видливите и невидливите нешта што децата треба само да ги препознаат или допрва да ги научат,, ќе кажат од Арс Ламина

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.