Цели шест часа траеше Печалбарската вечер во ресторанот ,,Сонце’’ кај Борисово општина Ново Село, каде се собраа стотоци иселеници кои живеат и работат во повеќе европски држави. Пејачот Јордан Митев со неговиот оркестар со одлично избраниот репертоар со македонски фолк песни, повторно направи одлична забава, збогатувајки ја предбожиќната празнична атмосфера.
Митев освен што пееше, во еден дел од забавата ги покажа и своите маестрални изведби на традиционалните македонски инструменти кавал и гајда при што атмосферата се вжешти во ресторанот ,,Сонце’’ кај Борисово.
Традиционално ,,Печалбарската вечер’’ се одржува во пресрет на Бадник и Божиќ, а печалбарите кои во овој период го посетуваат родниот крај, имаат можност своите деца, внуци, роднини и пријатели да ги запознаат со традиционалните македонски вредности како храната, виното, обичаите за овие празници но и македонската музика.
Како што информираа од организациониот одбор, на Печалбарската вечер биле присутни македонци кои живеат и работат во Холандија, Швајцарија, Италија, Германија, Шведска, В.Британија а гости имало и од соседна Бугарија – обожаватели на музиката на Јордан Митев. На забавата приуствувале и гости од Неготино, Валандово, Гевгелија, Радовиш но и од Скопје.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
