Утре и задутре во Дојран – „Д фестивал“ со десетина бендови и изведувачи

184

Утре 13 ти август во Дојран почнува единаесеттото издание на музичкиот фестивал „Д фестивал“ кое годинава ќе трае два дена и ќе се одвива само на главната бина. На првиот фестивалски ден, организаторите најавуваат дека ќе настапи електронското дуо „Горгон сити“ и бендовите „Дубиоза колектив“, „Фолтин“ и „Репетитор“. Вториот ден предвидено е да настапи Кирил Џајковски, раперот Страјк, хип-хоп изведувачот „Смоке мардељано“ и бендовите „Смат“ и „21 век“.

„За ‘Д Фестивал’ безбедноста и здравјето на сите посетители и ангажирани лица е секогаш прв и најголем приоритет, а манифестацијата и оваа година ќе се одржува во согласност со мерките за заштита од пандемијата и со целосно придржување кон безбедносниот протокол за организирање на музички настани. Во моментов со тие мерки официјално е дозволен максимум 50% од капацитетот, а поради овие ограничувања ‘Д Фестивал ‘за жал нема да ги има сите свои автентични програмски сегменти и ќе биде во класично издание т.е. со програма само на главната бина каде што ќе се одвиваат музичките настапи од 21:00 до 02:30 часот“, велат организаторите.

Моментално во продажба се последните билети од ограничениот контингент преку „МкТикетс“ и на официјалната веб-страница на фестивалот, кои можат да се купат по цена од 850 денари за двата фестивалски дена, и по цена од 500 денари за еднодневен билет. Инаку, сите фестивалски влезници купени за изданието во 2020 година, односно најдоцна до 30 јули минатата година, важат и за овогодишното издание.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.