Струмички Астраион со победа над Преспа ја почна Првата лига, во недела дома на мегдан со Младост Богданци

580

Викендов стартуваа првенствата во Првата ракометна лига на Македонија која и оваа натпреварувачка сезона е поделена во две групи. Струмички Астраион се најде во групата А каде  првенството го почна со победа над Преспа Вардар од Ресен со 26:21. Целосна доминација имаа „астраионци“ кои имаа контрола и над играта и на резултатот.

Против ресенчани, доминираше одбраната кај струмичкиот прволигаш. На цврстата одбрана се надоврза и нападот во кој се истакна младиот Кире Георгиев кој десет пати ја тресеше мрежата на противникот но и Васе Наков со 7 погодоци. Во листата на стрелци  против Преспа Вардар се запишаа и Душан Ангелов, Ристо Георгиев, Дарко Катранџиев и Митко Ефтимов. Одличен на голот беше и Мите Ристов кој запиша 9 а Филип Ѓоргиев 1 одбрана.

Следното коло, во недела на 1 октомври го пречекуваат тимот на Младост 1977 од Богданци екипа која исто така со победа го стартуваше шампионатот. На свој терен беа супериорни против Текстилец со 32:26. Мечот е закажан во 18 часот во спортската сала Парк во Струмица.

Инаку четирите најдобри тима од групата 1 обезбедуваат пласман во плеј офф лигата каде ќе бидаат и четирите најдобри тима од Групата Б каде од Југоистокот е екипата на РК Радовиш. Најдобрите од новоформираната лига ќе обезбедат место во Супер лигата од идната сезона.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.