Струмичките пензионери протестираа пред општината, побараа линеарно зголемување на пензиите за 3 500 денари

450

Пензионери од Струмица денеска излегоа на протест пред зградата на Општина Струмица и уште еднаш побараа линеарно зголемување на пензиите за 3 500 денари. Пензионерите кои замаат помали пензии се пожалија дека не им се доволни за да можат достоинствено да живеат.

„Јас имам пензија од 15 000 денари. Што попрво со тие пари – да ги платам давачките, да земам лекарства и за храна, а знаеме дека се е покачено. Нека се покачат пензиите барем до 20 000 илјади денари“, рече Јован Јованов

Друг пензионер смета дека треба на сите пензионери да им се покачат пензиите за 3 500 денари.

„Минималната пензија на стасува за покривање на основните потреби, затоа треба да се зголемат. Со пензијата да можеме да живееме нормален живот, а не да бидеме социјални случаи. Пензионерите 30-40 години издвојувале средства во Фондот и затоа надлежните треба да ги прифатат нашите барања“, вели Никола Тренчевски

Инаку, денеска пензионери од Струмица по трет пат протестираа за зголемување на пензиите. Вчера пензионери протестираа пред Собранието во Скопје. Минатите денови се организираа протести и во други градови во земјата, а помасовен собир се најавува за 14 август преку кој пензионерите велат дека ќе се обидат да ги достават своите барања до надлежните власти.

За барањето за линеарно усогласување на пензиите став соопшти и Сојузот на здруженија на пензионерите на Македонија (СЗПМ). Оттаму велат дека линеарно усогласување нема ниту во земјите од нашето опкружување ниту во пензиските системи на европските земји.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.