Трите пумпи од хидросистемот „Ѓавато“ кои во саботата беа пуштени да работат за да се полни Дојранското езеро, денеска се исклучени, објави порталот СДК. Изминативе денови, како што наведува порталот, вода до каналот за Дојранското езеро од системот не стаса но за разлика од тоа, поплавени се засеани ниви вдолж цевководот од Ѓавато Богданско до Дорјанското езеро. Таква е и површината од декар и половина на Никола Стојанов од Фурка на местото викано „Крај река“ во богданско Црничани кој есенва ја засеал со пченица.
,, Планирам да одам да видам бидејки еден мој пријател ми пушти видео во кое се гледа како шприца вода од цевководот во мојата нива и е поплавена. Реагирав до надлежните да ја стопираат и незнам дали е сопрена водата. Цевководот поминува покрај мојата нива која што е засеана со пченица. Гледајки го видеото мислам дека е однесено се и ќе нема жито од нивата,, ни изјави Никола Стојанов од населеното место Фурка.
Вработени од Хидросистемот „Ѓавато“ потврдија дека ги стопирале пумпите кои завчера беа пуштени од страна на министерот за животна средина Изет Меџити. Соопштија дека имало реакции до нив од земјоделци дека водата од цевководот долг 22 километри им ги поплавила нивите. Признаа дека место да се активираат пумпите потребно е да се санира цевководот што од Ѓавато ја носи водата до Дојранското езеро.
,, Пред три часа се исклучени пумите со оглед дека на одредени позиции не е саниран цевковод па водата од истиот протекува. Завчерашното пуштање на дел од пумпите беше избрзано бидејки општо познато е дека цевководот е оштетен и на него има многу диви приклучоци. Сето тоа е нотирано и во записниците на државниот инспекторат за животна средина, кои низ годиите констатираа дека има и диви приклучоци од страна на земоделци,, ни изјавија вработени задолжени за системот кои сакаа да останат анонимни
Во саботата министерот за животна средина и вицепремиер Изет Меџити соопшти дека се пуштаат три техничко исправни пумпи од хидросистемот „Ѓавато“ со капацитет од 200 литри во секунда. Соопштија дека после три години мирување се активираат пумпите. Уште тогаш кажа дека за да има ефект по Дојранското езеро потребно е ставање во употреба на повеќе пумпи за да има капацитет од 600 до 700 литри во секунда а паралелно да се санира и цевководот на кој има и диви приклучоци од страна на земјоделците.
,, Пумпите ќе ги вклучиме и ќе ја следиме состојбата за да знаеме колку вода ќе стигне до езерото. Тоа е реалноста. Јас не можам да кажам колку ќе стаса. Пумпите ќе функционираат, јас ќе контролирам и ќе знам дали и колку вода ќе стаса, каде и колку ќе има загуби. Тоа ќе го простудираме и потоа дополнително ќе седнеме со министерот за да видиме што понатаму“, кажа раководителот на хидросистемот Јован Попов во саботата.
Министерот Меџити во саботата кажа дека неделава ќе имаат јасна слика околу хидросистемот Ѓавато и посочи дека не се многу пари околу санацијата кои ќе ги обезбедат само од Министерството.
,,Тоа што го слушам не е голем паричен товар за Министерството, за да се најде решение корисно и за земјоделците и за езерото“, кажа Меџити.
Хидросистемот Ѓавато е изграден во 2002 заради полнење на Дојранското Езеро и да се спречи еколошка катастрофа. Во 2022 година заради високите сметки за електрична енерија системот беше исклучен.Системот изминативе години се користеше и за дотур на вода во браната Паљурци кај Богданци при намален водостој. На системот се приклучени и повеќе правни и физички лица кои ги наводнуваат своите плантажи и ниви.( В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
