Почна уписот на деца за прво одделение во струмичките школи – кои деца може да се запишат?

265

Почна запишувањето на децата во прво одделение во општинските основни училишта во Струмица. Во месец мај родителот, односно старателот е должен да го запише детето кое до крајот на календарската 2023 година ќе наполни шест години или ќе наполни до 31 јануари идната година по претходно добиено мислење од педагогот или психологот во училиштето.

При запишувањето на детето во прво одделение родителот, односно старателот, е должен да достави потврди за примените задолжителни вакцини за детето, офталмолошки и стоматолошки преглед, издадени од надлежна здравствена установа.

Запишувањето на детето, на барање на родителот, односно старателот, здравствената установа може да го одложи за една година ако се утврди дека детето не е подготвено да оди на училиште. Децата кои не се вклучени во настава, а се со надмината возрасна граница, може да се запишат во основно училиште согласно член 14 од Законот за основното образование.

И во новата учебна година, а согласно Одлуката на Советот на општина Струмица од 30.12.2022 година, продолжува доделувањето на еднократна парична помош на семејства со првачиња запишани за прв пат во општинските основни училишта во висина од 2 илјади денари

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.