Набавени две возила со кои ќе се заловуваат бездомните животни во Југоисточниот регион, ќе бидат дадени на Струмица и Валандово

474

Центарот за развој на Југоисточниот плански регион набави  две возила со кои ќе се заловуваат бездомните животни кои ќе бидат во функција на стационарите во Струмица и Валандово. Станува збор за посебни возила во рамките на проектот „Изградба на две прифатилишта за бездомни животни“ во Југоисточниот плански регион кој се финансира од Министерството за локална самоуправа – Биро за регионален развој

Возилата на претседателот на Советот на ЈИПР – Коста Јаневски ги предаде раководителот на Центарот за развој на Југоисточниот плански регион Жулиета Ѓуркова откако им ги предаде фирмата изведувач на проектот. Едното возило ќе се користи во Струмичко и Радовишкиот микро регион за потребите на прифатниот центар во Струмица, а другото возило за Гевгелиско-Валандовскиот микро регион со седиште во Валандово.

,,На следната Седница на Советот на Југоисточниот плански регион со Одлука ќе бидат дадени за трајно користење и одржување на општините Струмица и Валандово каде што ќе се наоѓаат прифатилиштата. Главна цел на проектот е подобрувањето на безбедноста на граѓаните во Југоисточниот плански регион преку заштита и згрижување на бездомните животни во регионот’’, ни изјави Жулиета Ѓуркова

Во меѓувреме се работи на подготовка на Студија за одржливо управување со двете прифатилишта и благосостојба на бездомните животни во Југоисточниот регион која ќе послужи за утврдување на соодветен модел за одржливото понатамошно управување со прифатилиштата.

Изградбата на прифатилиштето во Валандово е во почетна фаза, додека пак прифатилиштето во Струмица е целосно изградено и во моментот се работи на поврзувањето на водоводната и канализациска мрежа. Кон крајот на август, најдоцна почетокот на септември треба да пристигне комплетниот мебел и опрема, по што истиот веднаш би можел да биде ставен во функција.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.