Околу половина тон пиперки ќе се испечат, излупат и сомелат за да се прави ајвар во Босилово. Во организација на Општина Босилово, на училишното спортско игралиште ќе се одржи втората по ред „Ајверијада“ која има за цел да го промовира производството и специјалитетите што може да се прават од црвените пиперки. Се очекува дваесетина домаќинки од ова општина поделени во десет тимови на исто толку печки да го приготвуваат ајварот и тоа по традиционалните домашни рецепти.
Паралелно се очекува добар дел од домаќинките од Босилово да донесат и лутеница, малиџано, домашно сирење, баници, зелници… се она што значи вкусен залак и македонска традиционална храна. За таа цел ќе има и голем број штандови каде освен што може да се дегустира ќе има можност гостите и да се и купат се она што значи квалитетна храна приготвена на традиционален домашен начин.
Во делот на музичката програма на Ајверијадата во Босилово ќе настапат групата Мелос, Ленче и Горан Кукиќ како и КУД Браќа Минкови од Куклиш. Од општина Босилово упатуваат покана до сите граѓани да бидат дел од ова манифестација да бидат на лице место како се спрема ајварот но и да го вкусат.
Количините кои ќе бидат произведени и останат од ова манифестација, општината планира како и минатата година дел од нив да додели на социјално загрозени семејства а дел да ги подели на високи гости кои ќе ја посетат општина Босилово. ( В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
